Распачаўся збор сродкаў на экранізацыю «Народных мсціўцаў» Быкава

Аўтар праекту і рэжысёр — Аляксандар Меліхавец. Фільм павінен быць зняты на беларускай мове і з беларускімі акцёрамі, паведамляе Радыё Свабода.

«Ідэя зрабіць экранізацыю менавіта гэтага твора ўзнікла ў 2009 г. і з тае пары ў сувязі з пэўнымі перашкодамі прайшла праз некалькі вытворчых этапаў, у выніку якіх быў зроблены трэйлер да нязнятага пакуль фільма і пакладзены на паліцу шэраг працоўных матэрыялаў. У гэтым годзе я пляную давесці праект да завяршэння (перазняць цалкам з іншымі акцёрамі) і кінапаказу», — адзначае кіраўнік праекту.

Паводле ягоных слоў, апавяданне Васіля Быкава «Народныя мсціўцы» «ўздымае шмат цікавых пытанняў маральнага выбару, заезджанай ужо „талерантнасці“, цярплівасці і г.д».

«Прычым, праблематыка, моманты, разглядаемыя ў творы, характэрны не толькі для беларусаў, яны ў прынцыпе, агульначалавечыя», — падкрэслівае Меліхавец.

На здымкі фільма трэба сабраць 12 тысяч рублёў (прыблізна 6 тысяч даляраў). На дадзены момант ужо сабрана 1.895 тысяч — каля 15%.