У інтэрнэце сабралі 7 мільёнаў рублёў на пральную машыну і мікрахвалёўку для Ніны Багінскай

«Дзякуй усім неабыякавым, хто паўдзельнічаў у акцыі — грошы сабраныя. Цяпер спадарыня Ніна на лецішчы, але як толькі вернецца, то адразу набудзем тэхніку і перадамо ёй», — сказала Юля Сцяпанава Свабодзе.

Яна дадала, што спадарыня Багінская з цяжкасцю пагадзілася на такую дапамогу ад грамадскасці. Калі суд верне канфіскаваную ў яе маёмасць, яна збіраецца перадаць набытую тэхніку тым, хто мае ў ёй патрэбу.

27 траўня дзеці Ніны Багінскай накіравалі ў суд скаргу, дзе гаворыцца пра тое, што канфіскаваная маёмасць належыць ім. Пра гэта сведчаць і прыкладзеныя дакументы на куплю-продаж тэхнікі.

Паводле сына Ніны Багінскай Паўла, у скарзе ён адзначыў: у сям’і 7-месячнае дзіця, і пральная машына — неабходнасць.