У Мінску з’явіцца каталіцкая тэалагічная акадэмія

Пра гэта карэспандэнту "Радыё Рацыя" паведаміў арцыбіскуп Тадэвуш Кандрусевіч у час нацыянальнага эўхарыстычнага кангрэсу, які праходзіць у Гародні.

"На сённяшні дзень ідзе праца толькі па выдзяленні зямлі. Але яна ідзе. Гэта доўгі працэс. Пад ляжачы камень вада не цячэ. Трэба шукаць святароў, але ў Мінску іх ужо нямала ёсць, якія маюць навуковыя ступені. Таму можна ўжо распачынаць усе арганізацыйныя справы, але буданак – гэта найважнейшае. Будынак сёння пабудаваць – нялёгкая справа, трэба мець зямлю. І акурат цяпер ідзе працэс выдзялення гэтай зямлі", - распавёў Тадэвуш Кандрусевіч.

Тэалагічная акадэмія імя Святога Яна Паўла ІІ будзе разлічана на святароў і свецкіх вернікаў. Месца размяшчэння Акадэміі вызначана на вуліцы Філімонава, каля Нацыянальнай бібліятэкі.

Тэалагічная акадэмія плануе рыхтаваць спецыялістаў з вышэйшай адукацыяй розных ступеняў, а таксама навуковых работнікаў вышэйшай кваліфікацыі, у тым ліку святароў. Студэнты будуць вывучаць тэалогію, біблеістыку, кананічнае права, гісторыю, літургіку, катэхізацыю, філасофію, этыку, рэлігіязнаўства, сродкі масавай камунікацыі, сацыяльнае вучэнне і служэньне, замежныя мовы і многае іншае - у адпаведнасці з нормамі і вучэннем Рымска-каталіцкага касцёла.