Правабарончы цэнтр “Вясна” адзначае 20-годдзе

Гісторыю ўзнікнення арганізацыі ўзгадвае старшыня “Вясны”, былы палітвязень Алесь Бяляцкі:

- Мы пачалі працу як ініцыятыўная група па дапамозе рэпрэсаваным, ахвярам палітычных рэпрэсіяў пасля разгону “Чарнобыльскага шляху” ў красавіку 1996 году. І з тых часоў, на жаль, гэтая наша праца не спыняецца. Чаму на жаль? Таму што ўзровень ціску на беларускае дэмакратычнае грамадства з боку аўтарытарных беларускіх улад застаецца стабільна высокім.

Ці магчыма зьмяніць сітуацыю ў сувязі з паляпшэннем стасункаў паміж Еўразвязам і Беларуссю?

"Пакуль нішто пра гэта не гаворыць. У Беларусі працягваюць адмаўляць у рэгістрацыі няўрадавым арганізацыям. Таму мы не разлічваем на гэта, мы чакаем яўнага палітычнага сігналу з боку беларускіх уладаў на гатоўнасць рэгістраваць няўрадавыя арганізацыі. 13 гадоў мы працуем без рэгістрацыі", - гаворыць Бяляцкі.

У Мінск на вечарыну з нагоды 20-годдзя “Вясны” з’едуцца сябры цэнтру з 15 рэгіёнаў Беларусі. Прымуць удзел і прадстаўнікі іншых праваабарончых арганізацыяў, а таксама дыпламаты й прадстаўнік Бюро па дэмакратычных істытутах і правах чалавека АБСЕ.

За час існавання „Вясны” яе чальцы неаднаразова арыштоўваліся, гублялі працу. Цэнтр ужо 13 год працуе без дзяржаўнае рэгістрацыі.

Цяпер «Вясна» займаецца шырокім колам пытанняў: бароніць правы чалавека, дапамагае грамадзянам юрыдычна, вядзе прававую адукацыю і асвету, складае агляды-хронікі парушэнняў правоў чалавека, назірае за выбарамі, займаецца праблемамі ўтрымання зняволеных у турмах, праводзіць кампанію па адмене смяротнага пакарання. Падчас вечарыны будзе прадстаўленая тэматычная фотавыстава. Будзе прэзентавана кніга эсэяў і ўспамінаў вясноўцаў, паведамляе "Радыё Рацыя".