У Мінску прайшла акцыя "Праспект нацыянальнага сцяга", улады перакрылі рух

Акцыя сабрала некалькі дзясяткаў чалавек, якія выстраіліся ўздоўж праспекта Незалежнасці да ўніверсама "Цэнтральны" з бел-чырвона-белымі сцягамі і стужкамі. Сярод удзельнікаў - былыя палітвязні Мікалай Статкевіч, Мікалай Аўтуховіч, Зміцер Дашкевіч, актывісты Вольга Нікалайчык, Леанід Кулакоў, Ніна Багінская і іншыя.

Амаль адразу з'явіліся супрацоўнікі міліцыі, якія пачалі складаць пратаколы на ўдзельнікаў акцыі, піша "Радыё Свабода". 

Рух на праспекце ля Кастрычніцкай плошчы фактычна перакрыты. Прычыны – невядомыя. Перыядычна праязджаюць палівальныя машыны, якія мыюць праспект. Актывісты: «ДАІ адмыслова перакрылі рух на праспекце, пусцілі палівачкі. Гэта каб нас ўбачыла менш людзей».

Мікола Статкевіч падзякаваў усім за ўдзел і заявіў, што бел-чырвона-белы сцяг абавязкова вернецца як дзяржаўны.

Актывіст Сяргей Пальчэўскі, які пасля ўдзелу ў акцыях пратэсту страціў працу, сказаў: "Усё роўна буду ўдзельнічаць".

Удзельніца акцыі Крысціна адзначыла, што 5 год ужо гэтак не мылі праспэкт, як зараз, прычым толькі гэты кавалак. 

Паводле інфармацыі ад назіральнікаў БХК, пратаколы на ўдзельнікаў акцыі складалі 2-х відаў: па артыкулу 23.4 (непарадкаванне міліцыі) і артыкулу 23.34 (несанкцыянаванае масавае мерапрыемства) Кодэксу аб адміністрацыйнай адказнасці.