ЕГУ абяцае працягнуць дзейнасць і без падтрымкі скандынаўскіх краін

Нагадаем, 11 траўня стала вядома, што скандынаўскія краіны спыняюць фінансаванне Еўрапейскага гуманітарнага універсітэта. Як гаворыцца ў паведамленні сайта Паўночнай рады — рады міністраў замежных спраў краін Скандынавіі і Балтыі, гэта адбываецца ў сувязі з рэструктурызацыяй бюджэту з мэтай вызваліць сродкі для працы па інтэграцыі бежанцаў і мігрантаў. Падкрэсліваецца, што рашэнне асноўваецца на выніках працэсу, у якім прадметам абмеркавання былі роля і стратэгія ўніверсітэта.

«Супольнасць ЕГУ выказвае падзяку за непасрэдную фінансавую падтрымку з боку шматлікіх донараў універсітэта, у тым ліку Рады Міністраў Паўночных краін, накіраваную на забеспячэнне фінансавай падтрымкі і стыпендый для студэнтаў з Беларусі, якія атрымліваюць якасную еўрапейскую вышэйшую адукацыю ў галіне гуманітарных і сацыяльных навук, - гаворыцца ў афіцыйнай заяве ЕГУ. - Як і ў кожным асобным выпадку, донары штогод переглядаюць уласныя прыярытэтныя накірункі фінансавай падтрымкі, зыходзячы з асноўных палітычных і эканамічных выклікаў у асобных рэгіёнах і ў свеце агулам. ЕГУ з паразуменнем ставіцца да надзвычайных выклікаў, якія сёння суправаджаюць міграцыйны крызіс у Еўропе, і нядаўняга рашэння Рады Міністраў Паўночных краін па аказанні фінансавай дапамогі для вырашэння гэтага пытання. Рада Міністраў Паўночных краін з’яўляецца адным са шматлікіх донараў універсітэта, і фінансавая падтрымка з яе боку адасобленая ад ахвяраванняў індывідуальных урадаў Паўночных краін (г.з. Швецыі, Фінляндыі, Даніі і інш.). ЕГУ шчыра разлічвае на тое, каб пабачыць Раду Міністраў Паўночных краін у ліку донараў універсітэта ў найбліжайшай будучыні».

ЕГУ «застаецца верным сваёй першапачатковай місіі па ўмацаванні пазіцый Беларусі на палітычнай, адукацыйнай і культурнай мапе Еўропы і Заходняга свету». Кіраўніцтва ЕГУ абяцае, «прызнаючы складаныя эканамічныя выклікі сучаснай Беларусі», зрабіць «прыёмную кампанію ЕГУ 2016 года яшчэ больш адкрытай і даступнай для абітурыентаў з Беларусі». ЕГУ ўводзіць бесплатныя месцы на ўсіх бакалаўрскіх і магістарскіх праграмах, а таксама зніжае максімальны гадавы кошт навучання на вочным аддзяленні бакалаўрскіх праграм з 2500 да 2000 еўра для грамадзян і пастаянных рэзідэнтаў Беларусі.