Віталь Гуркоў: Грошы, якія мне сабралі, лепш перадаць у дзіцячы хоспіс

Днямі стала вядома, што знакаміты беларускі баец, які ў сакавіку стаў чэмпіёнам Беларусі па муай-тай, можа не паехаць на чэмпіянат свету, што стартуе 19 мая ў Швецыі.

“Цікава, ці знойдуць грошы чыноўнікі з Федэрацыі на спартсмена, ад якога яны пазбавіліся з-за яго музычнай дзейнасці. Час ідзе, а яснасці няма. Ці нам на канцэртах скрыначку паставіць з надпісам “Гуркову на чэмпіянат”?” – напісаў спартсмен у адкрытай суполцы ў Viber.

Пасля таго, як гэтая навіна з’явілася ў СМІ, у інтэрнэце быў абвешчаны збор грошай на ўдзел Віталя Гуркова ў чэмпіянаце. Праект атрымаў назву «Народны чэмпіён». І менш чым за суткі неабыякавыя людзі сабралі тры тысячы еўра, якія і былі неабходны для ўдзелу ў сусветным першынстве.

“Я, безумоўна, не чакаў, што падымецца такая хваля падтрымкі ды пачнецца збор грошай, – паведаміў Віталь Гуркоў “Народнай Волі”. – Гэта ж не мая была ініцыятыва, але ўсё вельмі ўразіла! Але гэтыя грошы я не вазьму, мне б хацелася іх выкарыстаць па-іншаму. Лепш іх перадаць у які-небудзь дзіцячы хоспіс. Каб яны пайшлі на дапамогу тым людзям, якім гэта жыццёва неабходна, а не на тое, каб Віталь Гуркоў паехаў у Швецыю. А на першынство і сам знайду магчымасць, як патрапіць”.