Прадпрымальнікі ствараюць прафсаюз і збіраюць подпісы для звароту ў Канстытуцыйны суд

Група прадпрымальнікаў, якія вядуць змаганне за адмену 222 указу Аляксандра Лукашэнкі, пачалі збіраць 50 тысяч подпісаў, неабходных для звароту ў Канстытуцыйны суд Беларусі, да Аляксандра Лукашэнкі і ў Палату прадстаўнікоў Нацыянальнага сходу.

Мэта - дамагчыся адмены 222 указу Аляксандра Лукашэнкі, які абавязаў прадпрымальнікаў гандляваць толькі з выкарыстаннем сертыфікатаў на ўсе тавары, у тым ліку прывезеныя з Расіі, паведамляе "Радыё Свабода".

11 красавіка ініцыятыву агучылі прадпрымальнікі Анатоль Зьмітровіч, Алесь Макаеў, Мікалай Аўтуховіч, Аляксандар Абрамовіч, Мікалай Чарнавус, Міхаіл Латышаў, Тацяна Кірычэнка ды іншыя, якія называюць сябе «Камітэтам выратавання прадпрымальніцтва».

Таксама прадпрымальнікі абвясцілі пра намер стварыць свой уласны прафсаюз пад назвай «Салідарнасць». «Такая славутая назва абраная, каб людзі і ўлады ведалі, за што мы змагаемся», - патлумачыў прадпрымальнік з Ваўкавыску, былы палітвязень Мікалай Аўтуховіч.

Іншыя дадалі, што асноўная мэта прафсаюзу - бараніць прадпрымальнікаў ад пераследу ўладаў за пратэставыя дзеянні. Затрымку са стварэннем прадпрымальніцкай «Салідарнасці» актывісты патлумачылі падзелам руху на розныя плыні, адну з якіх узначальвае Анатоль Шумчанка.

«Гэтая стратэгія складаецца з трох напрамкаў. Першы - гэта інфармацыйны. Тут пачнём са звароту да Лукашэнкі і ў Канстытуцыйны суд. Але, каб яго разгледзелі, нам патрэбна сабраць 50 тысяч подпісаў. Таксама звернемся ў Цэнтравыбаркам з прапановай увесьці прадпрымальнікаў у выбарчыя камісіі і прапануем сваіх прадстаўнікоў на Ўсебеларускі сход.

Другі напрамак - мабілізацыйны. Тут мы маем намер максімальна павялічыць структуру, адкрыць нашы філіі ў абласных і раённых гарадах. І, нарэшце, маем намер, акрамя стварэньня свайго прафсаюзу пад назвай „Салідарнасць“, узяць удзел у выбарах у Палату прадстаўнікоў Нацыянальнага сходу. Будзем вылучаць сваіх прадстаўнікоў, тым больш што подпісы за вылучэнне ў асяродздзі прадпрымальнікаў збіраць зручней», - распавёў Шумчанка пра планы.

Паводле прадпрымальнікаў, сваю стратэгію яны мяркуюць рэалізаваць за паўгода — і дамагчыся за гэты час адмены 222 указу ды іншых актаў, якія замінаюць «прадпрымальнікам выжываць».