Удзельнікі акцыі на Дзень Волі падтрымаюць ІП

Пра гэта Свабодзе паведаміў старшыня Партыі БНФ Аляксей Янукевіч.

Сёння ў Мінску прайшло чарговае пасяджэнне аргкамітэту па святкаванні 25 сакавіка Дня Волі.

Паводле слоў Янукевіча, удзельнікі аргкамітэту дамовіліся, што асновай ідэйнага напаўнення акцыі будзе зварот прэзідэнта Рады БНР Івонкі Сурвілы з нагоды 25 сакавіка.

«Мы знаходзімся ў кантакце з Радай БНР, і цягам двух тыдняў чакаецца, што гэты зварот з'явіцца, і менавіта яго мы будзем у першую чаргу выкарыстоўваць. Падчас акцыі таксама будуць выкарыстоўвацца лозунгі сацыяльна-эканамічныя, будуць лозунгі ў падтрымку індывідуальных прадпрымальнікаў. Аднак асноўная тэма — гэта абарона незалежнасці. Будуць лозунгі супраць расійскіх вайсковых базаў, будуць лозунгі за выхад з усіх утварэнняў, якія супярэчаць нацыянальным інтарэсам Беларусі і дзе дамінуе Расія», — паведаміў палітык.

У аўторак, 16 лютага, у Мінгарвыканкам пададуць заяўку на правядзенне мітынгу-шэсця 25 сакавіка. Апазіцыя плануе пачаць збор удзельнікаў акцыі а 18-й гадзіне, правесці спачатку кароткі мітынг на пляцоўцы каля Акадэміі навук, а потым шэсце да помніка Янку Купалу і мітынг.

«Таксама сёння было прынята рашэнне, што 24 сакавіка а 18-й гадзіне ва Управе БНФ адбудзецца ўрачыстае мерапрыемства, прысвечанае 20-годдзю вясны 1996 году — так званай „мінскай вясны-96“ (шэраг палітычных акцыяў беларускай апазіцыі ў перыяд з сакавіка па чэрвень 1996 году. — РС), якая сталася годным момантам у абароне беларускай незалежнасці і народным супраціве», — сказаў Янукевіч.