ЕГУ сцвярджае, што больш за 60 % іх выпускнікоў вяртаюцца ў Беларусь і някепска зарабляюць

ЕГУ аспаўсюдзіў статыстычную інфармацыю пра сваіх выпускнікоў.

Паводле прэс-рэліза ЕГУ, па дадзеных апытання, 62,2 % выпускнікоў ЕГУ жывуць у Беларусі, куды яны вярнуліся пасля навучання ў універсітэце. 83,3 % рэспандэнтаў маюць пастаяннае месца працы, якое ў большасці выпадкаў цалкам або часткова адпавядае кірунку навучання ў ЕГУ.

64,6 % выпускнікоў універсітэта працуюць у прыватным сектары эканомікі, 17,4 % - у няўрадавых арганізацыях, 10,1 % - у дзяржаўных установах Беларусі.

Пры гэтым 49,4 % выпускнікоў ЕГУ зарабляюць вышэй сярэдняй штомесячнай зарплаты па Мінску. На думку арганізатараў апытання, гэта з'яўляецца «важным паказчыкам кар'ерных дасягненняў» выпускнікоў ЕГУ, а таксама сведчыць аб высокай якасці адукацыі ў ВНУ, якое «дае выпускнікам шэраг пераваг і робіць іх запатрабаванымі на рынку працы Беларусі».

Еўрапейскі гуманітарны універсітэт быў заснаваны ў Мінску ў 1992 годзе, у 2004-м - зачынены беларускімі ўладамі па ідэалагічных прычынах. Праз год універсітэт аднавіў працу ў Вільні. Ён з'яўляецца літоўскай ВНУ, але мае нефармальны статус беларускага універсітэта ў выгнанні. Фінансуе ЕГУ кааліцыя міжнародных донараў, якія падтрымліваюць універсітэт як альтэрнатыву дзяржаўным ВНУ Беларусі.