Навукоўцы: мозг дзяцей памятае забытую родную мову

Як паказала даследаванне псіхолагаў і нейрафізіёлагаў канадскага Універсітэту Макгіла,апублікаванае ў часопісе Nature, людзі ўспрымаюць як родную тую мову, што чулі ў першыя гады жыцця, нават калі ў свядомым узросце сталі размаўляць на іншай мове, піша "Радыё Свабода".

Пад назіраннем праз магнітна-рэзанансную тамаграфію паддоследныя праходзілі тэсты на хуткасць і эфектыўнасць апрацоўкі інфармацыі, што перадавалася па-французску. Сярод паддоследных былі 10 дзяцей, якія нарадзіліся ў Францыі і размаўлялі толькі па-французску, 21 дзіцё, народжанае ў Кітаі і ўсыноўленае французскімі сем’ямі ва ўзросце да 2 год, 12 дзяцей-кітайцаў, якія вывучалі французскую як замежную і вольна размаўлялі на ёй. Набор зонаў у мозгу, што актываваліся падчас апрацоўкі інфармацыі, пачутай на французскай мове, адрозніваўся ў розных груп. Дзеці, што вывучалі французскую як замежную, мелі актыўнасць у больш шырокім наборы зон у параўнанні з тымі, у каго французская мова матчына: уключаліся рэгіёны, адказныя за рабочую памяць, увагу і пазнанне.

Тыя ж, хто чуў у раннім узросце кітайскую, але ведаў толькі французскую, апрацоўвалі інфармацыю па-французску так жа, як тыя, хто вывучаў французскую як замежную. І на кітайскую рэагавалі так жа, як тыя, каму кітайская была роднай, хоць самі кітайскай не ведалі.

Даследаванне паказала: яшчэ да таго, як чалавек асэнсоўвае панятак "родная мова", да ўзросту 1,5-2 год ён натуральным шляхам вучыць мову, якую чуе, а пазней вывучаныя мовы ўспрымае як няродныя, нават калі не валодае роднай.