Студэнты БДУ шакаваныя стаўленнем адміністрацыі да іх петыцыі

Ужо на наступны дзень, 12 лістапада, на сайце ўніверсітэта з'явілася інфармацыя, што палажэнне ўхваленае.

Адзін з ініцыятараў падачы петыцыі распавёў "Радыё Свабода", што студэнты такой навіной былі "шакаваныя":

"Не чакалі, што проста на наступны дзень гэта зробяць. Адразу было зразумела, што гэта плявок нам у твар. Сёння збіраемся пайсці і запісацца на прыём да рэктара, каб пагаварыць. Спадзяемся, што ён нас прыме, і нейкая размова будзе", — кажа студэнт.

"Тэрміновае" прыняцце Палажэння наўпрост звязана з іх петыцыяй, упэўнены ён:

"Адразу было відаць, што прыняцце гэтага дакумэнта ўчора было зроблена спехам, бо там нават ёсць памылкі. Рабілі, каб як мага хутчэй, бо мы пазаўчора прынеслі гэты зварот".

Прэс-служба БДУ паведаміла, што каментароў вакол сітуацыі са студэнцкай петыцыяй універсітэт даваць не будзе. Пытанне сустрэчы рэктара са студэнтамі пакуль таксама не разглядаецца.

"Палажэнне зацверджанае. Там ёсць аргументаваныя адказы на прэтэнзіі студэнтаў у адпаведнасці з Кодэксам аб адукацыі, ёсць каментары. Усе адказы ёсць у гэтай афіцыйнай заяве", — паведаміла прадстаўніца прэс-службы.