У сеціве з'явіўся фільм Animal Planet пра Белавежскую пушчу (відэа)

45-хвілінную дакументальную стужку "Белавежская пушча. Адвечны лес" ад аператараў сусветна знакамітага тэлеканала Animal Planet цяпер можна паглядзець бясплатна. У сеціве фільм з'явіўся на расійскай мове. Акрамя таго, ён быў агучаны на ангельскай, баўгарскай, польскай, румынскай і чэскай, паведамляе "Радыё Свабода".

У чэрвені-ліпені 2015 году здымачная група Animal Planet (Europe) Discovery здымала ў нацыянальным парку "Белавежская пушча" дакументальны фільм пра запаведнік і яго жыхароў. Вялікая ўвага ў стужцы аддадзеная захаванню рэдкіх відаў жывёлаў, да якіх стваральнікі стужкі намагаліся падабрацца максімальна блізка, і краявідам, паказаным з незвычайных ракурсаў.

Сусветная прэм’ера адбылася 27 верасня. За два дні да яе стужку пачалі паказваць у малой залі Палаца Рэспублікі і іншых кінатэатрах Беларусі. Таксама фільм ішоў у кабельных сетках Беларусі.

Аўтары фільму адзначылі і прывабнасць парку для турыстаў. З нядаўняга часу замежнікам дазволена наведваць Белавежскую пушчу цягам трох дзён бяз візаў, з адным толькі пашпартам.