У Мінску – зноў ужо традыцыйны Агракультурны фэст (фота)

29-30 жніўня Галерэя сучаснага мастацтва «Ў», Таварыства «Зялёная сетка», ГА «Экадом», установа «Агра-Эка-Культура» і літоўская арганізацыя «Kulturos Ambasada» ладзяць традыцыйны Агракультурны фэст, «каб усвядоміць ролю чалавека ў навакольным свеце, каб задумацца над тым, як на нас уплываюць прыроднае асяроддзе і прадукты, якія мы спажываем».

Арганізатары прапаноўваюць «спыніцца і задумацца, якой павінна быць ежа, каб яна не толькі насычала, але і прыносіла карысць, рабіла нас больш здаровымі, адчуць на сабе сілу прыроднага праз творы мастакоў, паспрабаваць знайсці ўнутраную гармонію з наваколлем».

Першы дзень фэсту распачаўся экскурсіяй па гарадскім агародзіку, які зрабілі экаактывісты ўвесну гэтага года. Нягледзячы на жорсткае па спякоце сёлетняе лета – вынікі ўсё ж ёсць, і эколагі даводзяць, што такое агародніцтва – магчымая і карысная (з розных бакоў чалавечага жыцця – гаворка нават не столькі пра забяспячэнне ежай) справа.

Цікава было паўдзельнічаць у «сляпой» дэгустацыі – арганічны прадукт vs прадукты з крамы. Трэба зазначыць, што большасць дэгустатараў правільна вызначылі паходжанне прадуктаў.

У гэтым годзе, паводле арганізатараў, вырашана надаць болей увагі мастацкім праектам. Напрыклад, лекцыя-прэзентацыя культурна-фермерскага праекта «Kultivator» (Швецыя), прэзентацыя і паказ фільма «Вочы Возера» (Літва) з каментарамі ўдзельніка праекту Ёзаса Лайвіса, прэзентацыя праекта «Памежнае мастацтва» - арт-тэрапія ў Свірскім псіханеўралагічным доме-інтэрнаце, фотаздымкі і шмат іншага.

І раім не прапусціць другі дзень фэсту – у нядзелю, 30 жніўня, гасцей мерапрыемства чакае фермерскі аграмаркет, дзе можна набыць разнастайныя прадукты, у тым ліку і беларускія кавуны.