Працоўныя завода "Строммашына" ў Магілёве некалькі месяцаў не бачылі заробкаў

На магілёўскім заводзе "Строммашына" не выплачваюць заробак ужо некалькі месяцаў. Прадпрыемства знаходзіцца на мяжы банкруцтва. Нядаўна прадалі адміністрацыйны будынак, арыштаванае за нявыплату закладу. У адміністрацыі заяўляюць, што цягам тыдня з работнікамі разлічацца са сродкаў ад гэтага продажу. Але прызнаюць, што выратаваць прадпрыемства гэтыя грошы не змогуць, паведамляе БелаПАН.

Адміністрацыйны будынак завода ўжо сышоў з малатка.

Аб нявыплаце заробкаў паведамілі работнікі прадпрыемства. Казаць публічна на гэтую тэму, аднак, адважыліся нямногія. У прыватных размовах казалі: заробленае не выплачваецца ад двух да трох месяцаў.

"За тры месяцы людзям не заплацілі, а ёсць і такія, якім за чатыры не заплачана. Тых, хто звольніўся, не разлічваюць. Людзі хадзілі да адвакатаў, юрыстаў і скардзяцца ў суд, так як заробленае нельга забраць. Заробкі ў нас невялікія, нават сорамна казаць - па 800 тысяч, па мільёну, у некаторых два мільёны", - кажуць яны.

У работнікаў калектыву няма ўпэўненасці ў будучыні прадпрыемства. Са слоў адной з суразмоўніц, многія мяркуюць, што завод прададуць.

"Кіраўніцтва, аднак, нас запэўнівае, што заказы ў прадпрыемства ёсць і будзем працаваць. Але сумневы ў нас, - разважае жанчына. - Крыўдна за завод. Заўсёды за намі было першае месца, а зараз першае месца ў распродажу".

Днямі адміністрацыйны будынак завода ў цэнтры горада купіла кіраванне юстыцыі Магілёўскага аблвыканкама больш чым за 31,5 млрд рублёў. Чатырохпавярховы будынак арыштавалі за нявыплату прадпрыемствам закладу і выставілі на аўкцыён. На ім, як паведамляюць мясцовыя СМІ, была толькі адна заяўка - ад кіравання юстыцыі.

Праблемы з выплатай заробкаў адміністрацыя завода прызнае. Сцвярджаецца, што грошы ад продажу адміністрацыйнага будынка дапамогуць разлічыцца з работнікамі прадпрыемства.

"Ад продажу гэтага будынка 10 млрд накіроўваюцца на пагашэнне запазычанасці заробкаў. Мы цяпер над гэтым працуем, і цягам, я так думаю, тыдня яны будуць на рахунках работнікаў", - адзначыў прадстаўнік адміністрацыі.

Разам з тым суразмоўца прызнаў, што перспектывы ў прадпрыемства змрочныя - яго могуць распрадаць па частках.