Беларусь стварае “Смарагдавую сетку”

Сетка ўяўляе сабой сістэму тэрыторый, якія знаходзяцца пад аховай дзяржавы і міжнародных экспертаў, распавёў «Радыё Рацыя» адзін са стваральнікаў “Смарагдавай сеткі” ў Беларусі, старшыня берасцейскага аддзялення грамадскай арганізацыі “Ахова птушак Бацькаўшчыны’’ Андрэй Абрамчук.

- У гэтым годзе Беларусь мусіць прадставіць поўны спіс такіх тэрыторый. Перадусім прапаноўваюцца тэрыторыі, якія ўжо маюць нацыянальны прыродаахоўны статус, але вельмі важна выявіць і новыя тэрыторыі, бо не ўсе віды, што падпадаюць пад дзеянне Бернскай канвенцыі, маюць нацыянальны прыродаахоўны статус.

Аналагам “Смарагдавай сеткі” ў Еўрапейскім звязе з’яўляецца Натура-2000. “Смарагдавая сетка” ўключае ў сябе тэрыторыі краінаў, якія знаходзяцца па-за межамі Еўразвязу, але прытрымліваюцца нормаў міжнароднага дакумента – Бернскай канвенцыі.