Супраць "Дажынак" пратэстуюць жыхары аграгарадку пад Магілёвам - праз свята ў іх адбіраюць агароды

Хутка жыхары аграгарадку Аўсянка Горацкага раёна, што на Магілёўшчыне, рызыкуюць застацца без уласных агародаў праз свята "Дажынак". Між тым, сваю зямлю вяскоўцы апрацоўвалі і плацілі за яе падаткі больш за 20 гадоў, паведамляе bchd.info.

Жыхароў Аўсянкі пачалі выклікаць у сельсавет з патрабаваннем на працягу пяці дзён вызваліць агароды, бо на іх месцы плануецца зрабіць газоны і ўсталяваць ліхтары.

Агулам плануецца забраць 15 агародаў. Замест іх аўсянкаўцам прапануюць надзелы далёка ў полі.

Аднак ніводзін з тых, каго выклікалі не пагадзіўся з патрабаваннямі ўладаў. Тым больш, што ніякага пісьмовага распараджэння яны не прадставілі.

Замест гэтага яны звярнуліся да актывісткі аргкамітэту па стварэнні партыі "Беларуская Хрысціянская Дэмакратыя" Жанны Шчарбінінай, якая ў 2010-2014 гадах была дэпутаткай Аўсянкаўскага сельсавету. З яе дапамогай быў складзены зварот са скаргай на дзеянні мясцовых уладаў у Магілёўскі аблвыканкам і пракуратуру. Зараз вяскоўцы чакаюць адказу.