Акцыя пратэсту прадпрымальнікаў на рынке "Ждановічы": затрыманы іхні лідар Макаеў

Сёння, 1 сакавіка, на рынку "Ждановічы" затрымалі лідара прадпрымальніцкага руху Алеся Макаева. Ён выступаў перад прадпрымальнікамі, паведамляе "Радыё Свабода". 

На рынку адбылася акцыя пратэсту: не выйшлі на працу прадпрымальнікі, якія не паспелі распрадаць рэшткі тавараў, а таксама не атрымалі неабходную сертыфікацыю.

Алесь Макаеў быў затрыманы і дастаўлены ў аддзяленне міліцыі на рынку "Ждановічы".

Як паведаміў Макаеў адразу на выхадзе з пастарунку, з яго ўзялі тлумачэнні, што ён рабіў у цэнтры "Мір моды", дзе гандляры абмяркоўвалі свой далейшы лёс. Макаева адпусцілі, але пазоў у суд альбо рашэнне пра сплату штрафу абяцалі выслаць заўтра. 

Па ацэнках Алеся Макаева, байкатавалі працу блізу 90% "іпэшнікаў", якія сплачваюць адзіны падатак, - гэта гандляры адзеннем, абуткам, галантарэяй, бялізнай і г. д.  

Дапытвалі Алеся Макаева начальнік РУУС Цэнтральнага раёну Менска Артур Шахлай,а таксама следчыя ды іншыя міліцэйскія чыноўнікі.

У панядзелак, 2 сакавіка, будзе абвешчана, якая мера спагнання пагражае прадпрымальніку. Спадар Макаеў ня мае адказу, што стала прычынай да затрымання. Відавочна, размова актывіста з калегамі пацягнула на "несанкцыянаванае масавае мерапрыемства". 

У адпаведнасці з нормамі загаду кіраўніка дзяржавы № 222 ад 16 мая 2014 года, 1 сакавіка скончыўся перыяд, падчас якога ІП - плацельшчыкі адзінага падатка магли рэалізаваць рэшту прадукцыі легпраму, увезенай з краін Мытнага саюза без дакументаў, якія пацвярджаюць набыццё і паступленне гэтых тавараў.