Мікалай Дзядок асуджаны на год турмы за спартыўныя штаны

Сёння закрыты суд у Магілёўскай турме асудзіў Мікалая Дзядка на год калоніі строгага рэжыму за “парушэнне рэжыму адбыцця пакарання па артыкуле 411 Крымінальнага кодэксу РБ”. Адбылося гэта за  тры дні да вызвалення па першым прысудзе.

Дзядку інкрымінавалі 16 парушэнняў рэжыму ў месцах зняволення, асноўным з якіх з'яўляецца нашэнне замест турэмнай робы спартыўнага касцюма, нагадвае Вясна. 

Працэс над палітвязнем распачаўся 25 лютага і праходзіў у адкрытым рэжыме. У гэты дзень у судзе дапытваліся сведкі.

Актывіст анархісцкага руху Мікалай Дзядок  асуджаны 27 траўня 2011 года судом Заводскага раёна Мінска па ч.2 арт. 339 КК (злоснае хуліганства) на 4,5 года зняволення ў калоніі ўзмоцненага рэжыму. Сваёй віны актывіст на судзе не прызнаў і адмовіўся падпісваць прашэнне аб памілаванні на імя Лукашэнкі.

У лістападзе 2014 года, за 3 месяцы да сканчэння тэрміну, на Мікалая Дзядка завялі новую крымінальную справу па артыкуле 411 Крымінальнага кодэксу РБ за “парушэнне рэжыму адбыцця пакарання”. "Следчыя дзеянні" цягнуліся 2 месяцы, потым справа была вернутая пракурорам на даследванне яшчэ на адзін месяц.