Выдаўца незалежнага выдання не пусцілі на пасяджэнне адміністрацыйнай камісіі

Сяргею Аржанцаву, выдаўцу грамадска-палітычнага бюлетэня “Клімавіцкая Інфа-Панарама”, які з’яўляецца сябрам ГА “БАЖ”, адмовілі ў праве прысутнічаць на пасяджэнні адміністрацыйнай камісіі Клімавіцкага райвыканкама.

Старшыня адміністрацыйнай камісіі Клімавіцкага райвыканкама Наталля Асмалоўская, якая адначасова з’яўляецца кіраўніцай справамі райвыканкама, забараніла Сяргею Аржанцаву прысутнічаць на пасяджэнні.

Між тым, згодна з артыкулам 2.14 Працэсуальна-выканаўчага кодэкса Рэспублікі Беларусь аб адміністрацыйных правапарушэннях, “справы аб адміністрацыйных правапарушэннях разглядаюцца адкрыта”.

У звязку з гэтым Сяргей Аржанцаў пакінуў адпаведны запіс у кнізе заўваг і прапаноў Клімавіцкага райвыканкама. Ён напісаў, што старшыня адміністрацыйнай камісіі Наталля Асмалоўская адмовіла яму ў праве прысутнічаць на пасяджэнні камісіі без тлумачэння прычын. І зараз Сяргей Аржанцаў жадае атрымаць афіцыйны адказ, чаму былі парушаныя яго грамадзянскія правы.

“Я хацеў папрысутнічаць на пасяджэнні адміністрацыйнай камісіі, бо там павінны былі разглядаць справы з удзелам шэрагу маіх знаёмых, якія, да таго ж, маглі зацікавіць чытачоў “Клімавіцкай Інфа-Панарамы”, – распавёў прэс-службе БАЖ Сяргей Аржанцаў. – Зараз буду чакаць рэакцыі з боку чыноўнікаў Клімавіцкага райвыканкама, а потым буду планаваць свае далейшыя дзеянні”.