У Мёрах усталяваная памятная шыльда ў гонар Генрыка Дмахоўскага

Намаганнямі грамадскасці горада Мёры ўсталявана памятная шыльда ў гонар скульптара і паўстанца Генрыка Дмахоўскага.

Шыльду ў гонар Генрыка Дмахоўскага ўсталявалі на будынку клуба ў вёсцы Забалоцце Мёрскага раёну. Будынак стаіць на падмурку сядзібы Дмахоўскіх, збудаванай у 1742 годзе. Пад клубам яшчэ захаваліся скляпенні XVIII стагоддзя, у якія, няма сумневу, спускаўся Генрык Дмахоўскі.

Дмахоўскі біўся за незалежнасць Рэчы Паспалітай у трох паўстаннях – 1830-31, 1848-49 і 1863 гадоў. Паміж паўстаннямі жыў на эміграцыі, займаўся скульптурай. Гэта Дмахоўскі зрабіў бюсты Касцюшкі, Вашынгтона, Франкліна, Джэферсана, што стаяць у будынку Сената Злучаных Штатаў. Дмахоўскі загінуў у баі з расійскімі войскамі 26.5.1863 года, яго магіла знаходзіцца каля вёскі Бірулі Докшыцкага раёна.

Мёрскія ўлады не пагадзіліся, каб Дмахоўскага прадставілі як паўстанца. “Славуты зямляк і скульптар” – прыйшлося напісаць на шыльдзе. Хто хоча ведаць, дакапаецца да праўды, адзначае рэсурс westki.info.