2-3 верасня — Летняя школа Беларускага калегіума-2017

У 2017 годзе спаўняецца 500 год беларускай друкаванай кнізе, беларускай Бібліі і, па вялікім рахунку, беларускай культурнай ідэнтычнасці.

Францішак Скарына ўвёў беларускую культуру ў чацвёрку першых, што здабылі друкаваную перакладную Бібліі да пачатку еўрапейскай Рэфармацыі. Рэфармацыя падштурхнула народы Еўропы да самаасэнсавання і спрычынілася да фармавання новых нацыянальных культур і, у выніку, да нацыянальных дзяржаў. У 16 стагоддзі Беларусь была ў самым віры еўрапейскіх рухаў, а часам апыналася на самым фронце інтэлектуальных, культурных і палітычных падзей.

• Што далі тыя працэсы нашай краіне з сёняшняга пункту гледжання?
• Як паўплывала на беларускае мысленне і фармаванне культурнай прасторы перарванасць еўрапейскай тоеснасці беларусаў?
• У якіх інтэлектуальных і культурных кантэкстах знаходзіць сябе цяперашняя беларуская супольнасць?
• Што адбываецца ў беларускай інтэлектуальнай прасторы?
• Як можа фармавацца сучасная беларуская ідэнтычнасць?
• У якой ступені на гэты працэс робяць (ці мусяць рабіць) уплыў, з аднаго боку, асэнсаванне сваіх здабыткаў і, з другога боку, памкненне інтэгравацца ў сучасны зменены свет?

Дзеля абмеркавання гэтых пытанняў прапануецца тэма Летняй школы Беларускага калегіума: "Францішак Скарына і перарваная традыцыя беларускай еўрапейскасці".

У школе праца будзе адбывацца ў некалькіх фарматах:

• Выступы вядомых беларускіх інтэлектуалаў, творцаў і медыяасобаў з развагамі на вострыя тэмы беларускай гісторыі, культуры, пісьменства, адукацыі, палітычнай думкі ды інш.;
• Студэнцкая канферэнцыя, да ўдзелу ў якой запрашаюцца слухачы ўсіх аддзяленняў Беларускага калегіума. На абмеркаванне выносіцца праблема зменаў беларускай ідэнтычнасці ў яе гістарычным, культурным, сацыялагічным, камунікатыўна-інфармацыйным ды інш. аспэктах. Канферэнцыя дасць магчымасць паглыблена абмеркаваць канцэптуальныя (і не толькі) пытанні, важныя для маладых беларускіх творцаў і інтэлектуалаў;
• Культурная праграма, нефармальныя камунікацыі і добры супольны адпачынак ў спрыяльнай атмасферы.

Да ўдзелу ў школе запрашаюцца студэнты, выпускнікі, выкладчыкі Беларускага калегіума, а таксама сябры супольнасці і сябры сяброў!

Летняя школа Беларускага калегіума адбудзецца ў суботў і нядзелю 2-3 верасня 2017 года ў прывабнай мясцовасці на Глыбоччыне.

Пражыванне ў камфортных дамках з усімі выгодамі.

Заяўкі на ўдзел у школе і тэмы дакладаў можна дасылаць на адрас электроннай пошты: [email protected].

Тэрмін падачы заявак — да 12 жніўня 2017 года.

Валанцёрская дапамога вітаецца.

Арганізацыйны ўнёсак: 55 рублёў.

Па дадатковую інфармацыю звяртайцеся на адрас электроннай пошты: [email protected].