17-18 лютага ў Мінску — варкшоп па развіцці дыстанцыйнай платформы Лятучага ўніверсітэта

У снежні мінулага года Лятучы ўніверсітэт запусціў платформу для дыстанцыйнай адукацыі. Для нас гэта магчымасць пераадолець абмежаванні часу і прасторы і зрабіць дасяжнымі для шырокага кола людзей унікальныя веды, новыя погляды і праблемы, способы і метады мыслення.

Платформа зараз існуе ў пілотным рэжыме, а мы працуем над яе далейшым удасканальваннем і развіццём. З гэтай мэтай Лятучы ўніверсітэт ладзіць варкшоп для тых, хто гатовы да суўдзелу ў развіцці платформы як новага інструманта дыстанцыйнай адукацыі, а таксама да выкарыстання яе ў сваёй адукацыйнай дзейнасці, стварэння і размяшчэння сваіх курсаў і лекцый на платформе.

Мы запрашаем да ўдзелу прадстаўнікоў арганізацый і ініцыятыў, якія ўжо маюць досвед стварэння сваіх дыстанцыйных адукацыйных курсаў ці маюць намер стварэння такіх курсаў у бліжэйшай будучыні, прадстаўнікоў адукацыйных арганізацый, якія выкарыстоўваюць ці жадаюць выкарыстоўваць дыстанцыйную адукацыю ў сваім навучанні, грамадскіх актывістаў, якія здымалі ці плануюць зняць відэаверсію свайго адукацыйнага курса, а таксама ўсіх, хто асабіста зацікаўлены ў развіцці платформы.

На варкшопе плануецца прадстаўленне платформы і яе магчымасцей, абмеркаванне формаў далучэння новых арганізацый, ініцыятыў ці асобных людзей да развіцця і супольнага кіравання платформай, распрацоўка механізма адбору курсаў для платформы, абмеркаванне патрабаванняў да відэакурсаў і ідэй бліжэйшых курсаў ды лекцый, планаванне прасоўвання платформы сярод мэтавай аўдыторыі (стварэнне піяр-стратэгіі) ды інш. С папярэднімі патрабаваннямі да відэакурсаў можна азнаёміцца па спасылцы.

Для ўдзелу ў варкшопе неабходна да 12 лютага 2017 года запоўніць электронную заяўку. Колькасць месцаў абмежаваная. Арганізатары пакідаюць за сабой права адбору ўдзельнікаў. Вынікі адбору будуць вядомыя не пазьней за 14 лютага 2017 года.

Варкшоп адбудзецца ў Мінску 17-18 лютага 2017 года (два поўных дні). Арганізатары забяспечваюць удзельнікаў харчаваннем, для іншагародніх будзе арганізавана пражыванне і кампенсаваны выдаткі на праезд у два бакі.

Па ўсіх пытаннях, звязаных з правядзеннем варкшопу, звяртайцеся на адрас электроннай пошты: [email protected] з пазнакай "Варкшоп".