9 лістапада ў Гомелі — імпрэза "Сучаснае беларускае мысленне: асобы, тэксты, кантэксты"

Невялічкі, амаль кішэнны варыянт зборніка цытат "Цытуй сваё!" паўстаў у лютым 2016 года як вынік працы шэрагу грамадскіх арганізацый і ініцыятыў, ён прадстаўляе сабой збор цытат беларускіх мысляроў, мастакоў, культурных і грамадскіх дзеячоў. Анталогія беларускага мыслення "Код прысутнасці", выдадзеная Лятучым ўніверсітэтам і Беларускім калегіумам, пабачыла свет у красавіку 2016 года. Сабраныя ў ёй амаль два тузіны тэкстаў самых розных жанраў і стылей ствараюць панараму імён, думак, канцэптаў, якія вызначалі інтэлектуальны пошук беларусаў за апошнія 15 гадоў. Розныя па фармаце і змесце, гэтыя два выдавецкія праекты кожны па-свойму прад’яўляюць беларускую думку шырокаму колу грамадства і робяць мысленне фактам і падзеяй беларускай культуры. І кожны з іх задае асаблівую оптыку нашага погляду на інтэлектуальнае жыццё новага тысячагоддзя.

Якое яно — сучаснае беларускае мысленне? Якія ідэі і адметнасці задаюць яго стыль, вызначаюць яго "беларускасць" і "сучаснасць"? Якія героі, знакавыя падзеі ствараюць разнастайнасць зместу? Якія тэмы найбольш хвалююць інтэлектуалаў?

Паспрабуем шукаць адказы на гэтыя пытанні, разважаць і спрачацца пра пакручасты лёс мыслення, пра яго паўставанне і сталенне ў гутарцы з тымі, хто непасрэдна стварае прастору мыслення — аўтарамі тэкстаў, ініцыятарамі цікавых інтэлектуальных праектаў і ўдзельнікамі шматлікіх дыскусій: культуролагам і філосафам Максімам Жбанковым і філосафам Паўлам Баркоўскім.

Імпрэза "Сучаснае беларускае мысленне: асобы, тэксты, кантэксты" адбудзецца 9 лістапада, у сераду, у гомельскім тайм-клубе "Флэт" (вул. Галавацкага, 19, гатэль "Надзея", 2-гі паверх). Пачатак у 18.00. Запрашаем усіх зацікаўленых далучыцца да падзеі!

На прэзентацыі можна будзе набыць Анталогію, а аўтары самых цікавых пытанняў філосафам атрымаюць у падарунак зборнік "Цытуй сваё!".

Каардынатар сустрэчы ў Гомелі — Яўген Меркіс: (+375 44) 7494166.