21 верасня — публічная лекцыя Уладзіміра Мацкевіча "Людзі, машыны, жывёлы: сяброўства і спакуса"

Публічная лекцыя будзе прачытана ў межах цыкла "Уяўляючы Беларусь: ідэі і вобразы для супольнай будучыні", які падчас Тыдня беларускага мыслення супольна ладзяць Лятучы ўніверсітэт і Міжнародны кансорцыум "ЕўраБеларусь".

Шмат тысячагоддзяў чалавек жыў сярод іншых людзей, і калі не браць у разлік першабытны стан анімізму, чалавек лічыўся як з роўнымі толькі з іншымі людзьмі. Нават не заўсёды прызнаючы правы іншых людзей, разглядаючы кагосьці як барбараў, кагосьці як "гаваркую прыладу".

Падаецца, што ў сярэднетэрміновай перспектыве нас чакаюць зусім новыя, нечаканыя раней выклікі і спакусы.

У будучыні нам прыдзецца жыць, працаваць, мець стасункі з машынамі, амаль разумнымі, амаль роўнымі людзям.

У будучыні мы яшчэ болей надамо правоў жывёлам, прычым такіх правоў і прэферэнцый, што некаторыя людзі мінулага пазайздросцілі б гэтым жывёлам.

Нам спатрэбіцца ўсталёўваць стасункі з жывёламі, з машынамі, падобнымі на людзей. І гэта спародзіць новыя выклікі і спакусы. Можа, камусьці лёс машын і жывёл падасца больш прывабным, чым лёс і наканаванне чалавека? Як мы захаваем чалавечае ў сабе?

Запрашаем шукаць адказы і разважаць пра антрапалагічную перспектыву разам з філосафам і метадолагам Уладзімірам Мацкевічам. Публічная лекцыя "Людзі, машыны, жывёлы: сяброўства і спакуса" адбудзецца 21 верасня, у аўторак, у прасторы "Корус8" (Мінск, прасп. Машэрава, 9). Пачатак у 19.30. Уваход вольны!

Наступныя лекцыі цыкла "Уяўляючы Беларусь: ідэі і вобразы для супольнай будучыні":

• 22 верасня (чацвер), 19.30-21.00 — Публічная лекцыя Яраслава Бекіша "Не-уяўляючы Беларусь: тры "зялёныя" ўтопіі". Разважаем пра стасункі чалавека з навакольным асяроддзем, этыку будучыні і "зялёныя" ўтопіі, як змяняюцца ўяўленні пра чалавека?
• 23 верасня (пятніца), 17.30-18.30 — Публічная лекцыя Змітра Задорына "Цэнтральная плошча як парок сэрца ў целе Мінска". Праз асэнсаванне гісторыі цэнтральнай плошчы Мінска, невырашальных праблемаў, звязаных з яе перабудовай, лектар разважае пра магчымасці яе "выздараўлення".
• 23 верасня (пятніца), 20.00-21.00 — Лекцыя з элементамі майстар-класа Ірэны Катвіцкай і Аляксея Варсобы (дуэт "АГАТА") "Беларусь праз музычную семантыку і сінтаксіс". Разважанне пра мысленне ў музыцы і інструментарый музычнага выказвання: музычны сінтаксіс і сэнсаўтваральныя адзінкі.
• 24 верасня (субота), 17.00-19.00 — Публічная лекцыя Ігара Бабкова "Уладзімір Абушэнка: рэканструкцыя ідэі". Разважанне пра Уладзіміра Абушэнку і ягоны час: рэканструкцыя кантэкста, жыццёвых і сацыльных дэкарацый, праектаў і схем думкі, месцаў і іх адсутнасці.

Усе лекцыі будуць праходзіць у мінскай прасторы "Корпус8" (прасп. Машэрава, 9). Уваход вольны!

У межах цыкла адбылося:

• 20 верасня — Публічная лекцыя Уладзіміра Галянкова "Інтэлектуальныя сістэмы: праблемы і перспектывы" (Фота і відэа).

UPD.: Відэазапіс публічнай лекцыі: