Шорт-ліст пераможцаў конкурса эсэ "Інтэлектуальная спадчына Беларусі: постаці, ідэі і кантэксты"

Конкурс ладзіўся ў межах кампаніі "Цытуй сваё", якая ставіла на мэту звярнуць увагу на беларускае мысленне як неад'емную частку нашай культуры. Нажаль, імёны мысляроў, іх ідэі канцэпты вельмі слаба ўсвядомлены і "ўзяты" ў культуру і самаразуменне беларусаў. Ініцыятары конкурса прапанавалі звярнуцца да розных гістарычных перыядаў і культурных кантэкстаў паўставання беларускага мыслення: ад самых далёкіх часоў да нашых сучаснікаў, якія рабілі свой унёсак у традыцыю апошнія дзесяцігодзі.

У журы ўвайшлі: філосаф і метадолаг, заснавальнік Лятучага ўніверсітэта Уладзімір Мацкевіч, бібліст і багаслоў, філосаф, акадэмічны дырэктар Беларускага калегіюма Ірына Дубянецкая, філосаф, лінгвіст, санскрытолаг і перакладчык, паэт Міхаіл Баярын, літаратар і перакладчык, лаўрэат літаратурных прэмій "Дэбют" і "Залаты апостраф" Віталь Рыжкоў, сацыёлаг, рэдактар аддзела культуры "Беларусского журнала" Лідзія Міхеева.

Да разгляду прымаліся арыгінальныя аўтарскія эсэ, у якіх праводзіцца аналіз, рэфлексія, канцэптуалізацыя ці робіцца працяг самых розных аспектаў беларускага мыслення.

У шорт-ліст конкурса ўвайшлі наступныя працы:

• "А хто там і дзе?" — Міхаіла Бараноўскага;
• "Уладзімір Фурс: Беларусь "тут і цяпер" — Таццяны Урублеўская-Токер;
• "Шлях і лёс інтэлектуала: постаці беларускай інтэлектуальнай традыцыі Аляксандра Фамiча Зайкi" — Вольгі Дайлід;
• "Еўдакім Раманавіч Раманаў. Кароткі нарыс жыцця і інтэлектуальнай дзейнасці" — Андрэя Кулеша;
• "На другіх шляхох" — Антося Уласенкі.

Цырымонія ўзнагароджання пераможцаў адбудзецца 25 верасня 2016 года падчас урачыстага закрыцця Тыдня беларускага мыслення ў прасторы "Корпус8" (Мінск, прасп. Машэрава, 9). Пачатак у 19.00. Уваход вольны!

Пераможцы атрымаюць каштоўныя ўзнагароды, а ўсе аўтары эсэ з шорт-ліста прыемныя падарункі. Найлепшыя працы ўдзельнікаў будуць апублікаваны на сайтах "Будзьмы", "Беларусского журнала", Лятучага ўніверсітэта, а таксама войдуць у альманах, які будзе выдадзены напрыканцы 2016 года.

У арганізацыйны камітэт конкурса ўваходзяць: Міжнародны кансорцыум "ЕўраБеларусь", Лятучы ўніверсітэт,  грамадская кампанія "Будзьма беларусамі!", Беларускі калегіум, "Мова Нанова", "Беларусский журнал".