#танчымЗаРэформы — студэнтаў запрашаюць станчыць каля ВНУ

Падпісваючы пагадненне, Міністэрства адукацыі Рэспублікі Беларусь узяло на сябе абавязкі выконваць не толькі дадзеную "дарожную карту", але і такія фундаментальныя каштоўнасці, як акадэмічныя свабоды і права студэнтаў на кіраванне сваёй навучальнай установай.

За мінуўшы амаль год Міністэрства адукацыі не зрабіла не толькі ніякіх канкрэтных крокаў па выкананню гэтых фундаментальных каштоўнасцей, але нават актыўна ігнаравала выпадкі ціску на студэнтаў за іх грамадзянскую пазіцыю з боку адміністрацый ВНУ. Падрабязную справаздачу пра гэтыя выпадкі і пра сам маніторынг імплементацыі "дарожнай карты" рэфармавання вышэйшай адукацыі Беларусі можна прачытаць на сайце Грамадскага Балонскага камітэта.

Акрамя гэтага, у лютым 2016 года сярод студэнтаў беларускіх універсітэтаў актыўна распаўсюджвалася хлуслівая інфармацыя пра "незаконнасць" і "антыдзяржаўнасць" дзейнасці такіх незалежных студэнцкіх арганізацый, як Цэнтр развіцця студэнцкіх ініцыятыў, Братэрства арганізатараў студэнцкага самакіравання і Студэнцкая Рада, якія ў сувязі з гэтым падпісалі калектыўны зварот і накіравалі яго ў адміністрацыю Беларускага дзяржаўнага медыцынскага ўніверсітэта.

Улічваючы ўсе гэтыя факты і бяздзейнасць чыноўнікаў, незалежныя студэнцкія арганізацыі, якія аб’ядналіся ў ініцыятыву "StudWatch", вырашылі прыцягнуць увагу да праблемы ігнаравання Міністэрствам адукацыі голаса простых студэнтаў і незалежных студэнцкіх арганізацый адмысловым флэшмобам: #танчымЗаРэформы.

Калі ты студэнт і хочаш сапраўды якасную адукацыю і незалежныя студэнцкія органы самакіравання, калі ты больш не можаш сядзець на сумных і састарэлых занятках, а вечныя паборы на бессэнсоўныя прафсаюзы і брсмы абрыдлі да такой ступені, што проста цярпення не хапае — дзейнічай па наступнай схеме:

1. Вазьмі тэлефон/фотаапарат/відэакамеру, якасць не мае значэння — галоўнае настрой!
2. Станчы на фоне свайго ўніверсітэта з сябрамі або сола і заздымі гэта ўсё;
3. Запосці ў сваіх акаўнтах сацсетак відос з хэштэгамі: #танчымЗаРэформы, #danceForReforms і выклічы 3-х сваіх лепшых сяброў зрабіць тое самае;
4. сачы за рэакцыяй Міністэрства адукацыі.

Мы верым, што не ўсе студэнты задаволеныя існуючым станам рэчаў, але зараз у нас мала магчымасцей паўплываць на сітуацыю: Міністэрства адукацыі ігнаруе нават патрабаванні Балонскага працэсу, куды яны так імкнуліся — што тады казаць пра меркаванне простых студэнтаў? І раз мы не можам змяніць сітуацыю, мы можам хаця б пасмяяцца з яе, таму і сёння, і заўтра, і да перамогі мы, студэнты розных ВНУ і пакаленняў, #танчымЗаРэформы, #dancesForReforms!

Каманда "StudWatch"