4 лістапада — адкрытая лекцыя Таццяны Вадалажскай "Homo Ludens" як антрапалагічная перспектыва"

Мы завем Лятучы ўніверсітэт "універсітэтам гульні". Чым жа ёсць "гульня", калі мы звязваем з ёй такую паважную і грунтоўную з’яву, як Універсітэт? І, больш за тое, звязваем з ёй уяўленні пра інавацыі, новыя сэнсы ідэі Універсітэт? Йохан Хёйзінга бачыў у гульні прастору стварэння культуры, а з ёй — і чалавецтва ўвогуле. Герман Гесэ шукаў у гульні выйсце і пераадоленне стану "фельетоннай эпохі". Мы ж спрабуем знайсці перспектывы для развіцця чалавека, паўставання "новага чалавека", здабыцця неабходных чалавечых якасцяў.

Як звязаць выклікі, з якімі сутыкаецца сучасны чалавек, з сутнаснымі характарыстыкамі гульні, схаванымі ад нас "несур’ёзнасцю" гэтай з’явы? Які ён — "чалавек гуляючы" (Homo Ludens)? Як ён авалодвае светам? Як ён стварае новыя сусветы? Як ён вырашае праблемы і як будуе сваё мысленне? Як ён нясе адказнасць? Ці можа гульня стаць ладам жыцця?

Запрашаем паразважаць над гэтымі пытаннямі на чарговай адкрытай лекцыі серыі "Галоўнае пытанне" — каардынатар Лятучага ўніверсітэта, метадолаг Таццяна Вадалажская прамаўляе на тэму "Homo Ludens" як антрапалагічная перспектыва". Адкрытая лекцыя адбудзецца 4 лістапада, у сераду. Пачатак у 18.30.

Усіх зацікаўленых просім папярэдне зарэгістравацца. Інфармацыя пра месца правядзення будзе дасланая зарэгістраваным удзельнікам напярэдадні.

Адкрытая лекцыя Таццяны Вадалажскай пачынае лістападаўскую серыю прамоў, у якой таксама прагучаць "галоўныя пытанні" ад: Алеся Разанава — 11 лістапада, Алега Дзярновіча — 18 лістапада і Аксаны Шэлест — 25 лістапада.

Расклад і тэмы лістападаўскіх лекцый глядзіце на сайце Лятучага ўніверсітэта: www.fly-uni.org.

UPD.: Відэазапіс адкрытай лекцыі:

Гл. таксама інтэрв'ю з Таццянай Вадалажскай напярэдадні лекцыі ды справаздачу аб адкрытай лекцыі