Выстава выцінанкі і "Жывыя размовы" пра правы чалавека прыедуць у Брэст

На "Жывыя размовы" з жыхарамі рэгіёна ў Культурным цэнтры "Грунтоўня" збяруцца юрысты і праваабаронцы грамадскіх арганізацый і ініцыятыў, якія дзейнічаюць як на Брэстчыне, так і па ўсёй Беларусі.

Наведнікі змогуць непасрэдна паразмаўляць са спецыялістамі, якія працуюць з праблемамі дыскрымінацыі, прымусовай працы, парушэння правоў грамадзян у месцах несвабоды, доступу да правасуддзя, парушэння права на юрыдычную дапамогу, доступу да інфармацыі, свабоды асацыяцый, жорсткага абыходжання з жывёламі і па іншых пытаннях, а таксама ажыццяўляюць грамадзянскі кантроль за дзейнасцю дзяржаўных органаў, займаюцца аналітычнай, адукацыйнай і асветніцкай дзейнасцю ў галіне правоў чалавека.

Гэта прадстаўнікі такіх арганізацый як:

• Беларускі Хельсінкскі камітэт;
• Беларуская асацыяцыя журналістаў;
• Праваабарончы цэнтр "Вясна";
• Праваабарончы цэнтр "Ідэнтычнасць";
• Цэнтр прававой трансфармацыі (Lawtrend);
• Праваабарончая ініцыятыва "Лапа закона";
• Моладзевая прафсаюзная група "Студэнцкая Рада";
• Міжнародны праваабарончы рух у Беларусі.

У кожнага падчас мерапрыемтсва будзе магчымасць атрымаць экспертныя парады ці кансультацыі наконт жыццёвых сітуацый, якія на першы погляд падаюцца невырашальнымі.

Падчас "Жывых размоў" будзе працаваць выстава-"сушка" паштовак "Дэкларацыя правоў чалавека ў выцінанцы" народнай мастачкі Вольгі Бабурынай, якая арыгінальным чынам увасобіла 30 артыкулаў Дэкларацыі, што распавядаюць пра агульначалавечыя каштоўнасці.

Чакаем вас 27 верасня 2015 года, у нядзелю, у Культурным цэнтры "Грунтоўня" па адрасе: г. Брэст, вул. Дзяржынскага, 14. Мерапрыемства будзе праходзіць з 14.00 да 17.00 і пабудаванае такім чынам, што далучыцца можна ў любы момант. Таму калі не будзеце паспяваць да пачатку — усё адно прыходзьце! Уваход вольны!