Публічная лекцыя і семінар Аляксандра фон Плато ў Мінску

Падчас свайго візіту гісторык прачытае публічную лекцыю, прысвечаную вуснай гісторыі і яе асноўным праблемам, а таксама для людзей, заангажаваных у вуснагістарычныя даследаванні, будзе праведзены практычны семінар па выкарыстанню метаду oral history у вывучэнні траўматычнай памяці.

Лекцыя мае адбыцца ўвечары 26 чэрвеня, а семінар пройдзе ўдзень 27 чэрвеня 2015 года ў Мінску.

Месца і час правядзення яшчэ ўзгадняюцца, таму просьба сачыць за абвесткамі на сайце Беларускага архіва вуснай гісторыі.

Уваход на публічную лекцыю будзе вольны.

Фармат семінара прадугледжвае абмежаваную колькасць удзельнікаў, таму просьба да ўсіх зацікаўленых ужо зараз накіроўваць заяўкі з пазначэннем кароткіх звестак пра сябе, матывацыі ўдзелу, узроўню ведаў у накірунку вуснай гісторыі, кантактнай інфармацыі на адрас электроннай пошты: [email protected].

Апошні тэрмін прыёму заявак: 24 чэрвеня 2015 года.

Пра лектара:

Аляксандр фон Плато (Alexander von Plato) — гісторык, заснавальнік і дырэктар Інстытута гісторыі і біяграфіі Універсітэта завочнага навучання г. Хагена, выдавец і сарэдактар часопіса аб біяграфічных даследаваннях і вуснай гісторыі "BIOS", сакратар і віцэ-прэзідэнт Міжнароднай Асацыяцыі вуснай гісторыі, аўтар шматлікіх публікацый, фільмаў і выстаў па нямецкай і міжнароднай гісторыі, запрошаны прафесар у Вене, Вініпегу, Варонежы.

Важным накірункам у даследаваннях Аляксандра фон Плато з'яўляецца тэма Другой сусветнай вайны. Гэтай тэматыцы прысвечана, выдадзеная гісторыкам у якасці рэдактара і сааўтара, кніга "Рабы Гітлера" (Hitler's slaves. NY: Berghahn Books, 2010), у якой на падставе асабовых жыццёвых гісторый пацярпелых адлюстроўваецца дзейнасць інстытута прымусовай працы ў акупаванай нацыстамі Еўропе.