Штогадовы дзіцячы эка-фестываль "Зялёны weekend"

"Зялёны weekend" - фэст, які пераплецены экалагічнай стужкай захапляльных майстар-класаў, гукавых дарожак і візуальных вобразаў, камунікацыі з наваколлем і фармаваннем экалагічнага ладу жыцця.

Фэст праводзіцца супольна Галерэяй "Ў" ды ініцыятывай "Дзіцячыя экамайстэрні" ў партнёрстве з таварыствам "Зялёная сетка", установай "Цэнтр экалагічных рашэнняў" і МТА "Экапартнёрства", а таксама пры падтрымцы іншых арганізацый.

Фэст атабарыцца як у прасторы Галерэі "Ў", так і ў іншых сумежных памяшканнях, а менавіта:

• у Кнігарні "ЛогвінаЎ", дзе адбудзецца майстар-клас па стварэнні ўласнага асобніка кнігі "Маленькі прынц" і музычная прэзентацыя кнігі Андрэя Хадановіча;
• ва ўнутраным дворыку з першым публічным гарадскім гародчыкам, дзе дзеткі будць вучыцца даглядаць расліны;
• ва "Ў-бары", дзе можна будзе паглядзець кароткія фільмы аб экалогіі і паспрабаваць экалагічна чыстыя прадукты.

Майстар-класы праводзяць людзі розных прафесій, паяднаныя ідэямі руплівага стаўлення да наваколля: эколагі, мастакі і дызайнеры, музыкі, урбаністы, педагогі і біёлагі .

У самой Галерэі "Ў" для падтрымання прыязнай атмасферы будзе гучаць адмыслова падрыхтаванае музычнае суправаджэнне ад "Aortha".

Новыя ўражанні, новыя веды, новы досвед - для дзетак 4-12 гадоў і ўсіх ахвочых у любых гадах!

Расклад майстар-класаў ды імпрэз:

6 чэрвеня (субота), 13.00-18.00: 

• 13.00-13.30 Экскурсія па "гарадскім гародчыку";
• 13.00-16.30 Экагульні на планшэтах з МГА "Экапартнёрства";
• 13.20-14.00 Дзе была лаза - з’явілася страказа! Майструем сракоз з вярбовых галінак;
• 13.20-14.00 Прэзентацыя дзіцячай кнігі "Нататкі таткі" Андрэя Хадановіча са спевамі пад гітару;
• 14.00-15.00 Што рабіць, каб не патануць у гарадскім смецці? (установа "Цэнтр экалагічных рашэнняў");
• 14.00-15.00 Майстар-клас з "Birdie Shop" - кожнай дзяўчынке па квяточнай заколке, а хлопчыкам - па бутаньерке (кошт: 70 тыс.);
• 14.00-15.00 Майстар-клас па напісанні і вырабе кнігі "Маленькі прынц"  з Аленай Сацутай;
• 14.00-15.30 Квест з "гарадскім ляснічым";
• 15.00-15.30 Экскурсія ў сапраўдную друкарню! Адчыняем дзверы таямніцы нараджэння кнігі;
• 15.00-15.40 Што такое экасертыфікацыя? (расшыфроўваем значкі на запакоўках), ГА "Экадом";
• 15.00-16.00 Вясёлы гарод з саджэннем ад "Экалабараторыі", свае расліны дзеткі змогуць забраць дадому;
• 15.30-16.30 Віктарына "Птушкі сталіцы" і кансультацыі па птушыных пытаннях ад ТА "Ахова птушак Бацькаўшчыны";
• 16.30-17.30 Майстар-клас з мастерам Веранікай Маскевіч, дзе кожны удзельнік зможа зрабіць сабе драўлянае ўпрыгожванне (кошт 50 тыс.);
• 16.30-17.20 Майстар-клас па сачыненні liveloop-музыкі з музыкам "Grusha8";
• 17.30-18.00 Канцэрт "Grusha8".

7 чэрвеня (нядзеля), 13.00-18.00:

• 13.00-14.00 Лэнд-арт і фоташкола для пачаткоўцаў ад "Дзіцячых эка-майстэрняў";
• 13.00-14.00 Віктарына "Птушкі сталіцы" і кансультацыі па птушыных пытаннях ад ТА "Ахова птушак Бацькаўшчыны";
• 13.00-15.00 "Лямец у горадзе" - майстар-клас па валянні. Кожны зробіць свой шэдэўр! (кошт: 50 тыс.);
• 13.00-17.00 Спраўдзі колькі ты ведаеш па экалогіі - з праграмай "GreenSteps" (для дзетак і дарослых);
• 14.00-15.00 "Гарадская майстэрня": ствараем макет горада з мастаком Bazil;
• 14.00-15.00 Майстар-клас з "Birdie Shop" - кожнай дзяўчынке па квяточнай заколке, а хлопчыкам - па бутаньерке (кошт: 70 тыс.);
• 14.30 -15.00 Экскурсія па "гарадскім гародчыку";
• 14.30-15.00 Экскурсія ў сапраўдную друкарню! Адчыняем дзверы таямніцы нараджэння кнігі;
• 15.00-15.30 Ствараем "экабомбы" і плануем партызанскае зялёнае хуліганства!;
• 15.00-16.00 Майстар-клас з мастерам Веранікай Маскевіч, дзе кожны удзельнік зможа зрабіць сабе драўлянае ўпрыгожванне (кошт: 50 тыс.);
• 15.00-16.00 Майстар-клас па напісанні і вырабе кнігі "Маленькі прынц" з Аленай Сацутай;
• 15.00-16.00 Дыскусія "Чаму ўсе так устрывожаны зменамі клімату?";
• 15.30-16.00 Біяразнастайнасць у фарбах - малюем на сценцы Галерэі "Ў" з Bazil;
• 15.30-16.10 Што такое экасертыфікацыя? (расшыфроўваем значкі на запакоўках), ТА "Экадом";
• 16.00-16.30 Сад у шклянцы. Робім сапраўдны зялёны цуд, каб упрыгожыць любы хатні пакой ці акенца ("Дзіцячыя экамайстэрні");
• 16.00-17.20 Барабанны майстар-клас разам са школай этнічных барабанаў "TekaDUM";
• 16.30-17.00 Знаёмімся з плыняй "слоў-фуд". У чым розніца паміж арганічнымі прадуктамі і звычайнымі з крамы (крама "Эка-ежа");
• 17.20-18.00 Канцэрт усімі любімага гурта "Нагуаль".

Абодва дні:

• Кансультацыі па "птушыных пытаннях";
• Куток toycrossing - абмен цацкамі, катушок для самых маленькіх;
• Bookcrossing - мяняемся кніжкамі на экалагічную тэматыку і аб навакольным свеце;
• Праверка экаведаў і экагульні на планшэтах;
• Трансляцыя экавідэа;
• Тэматычныя паштоўкі сваімі рукамі.

Уваход - вольны. Частка майстар-класаў - платныя.

Магчымы змены ў праграме - сачыце за навінамі.