Абвяшчаны набор на новую адукацыйную праграму "Еўрапейскі Саюз: палітыка, эканоміка, культура"

Адукацыйны курс ладзіць "Беларускі калегіюм" у партнёрстве з Інстытутам "Палітычная сфера" (Беларусь), грамадскімі аб’яднаннямі "Ліберальны клуб" і "Еўрапейскі клуб" (Беларусь), Універсітэтам Вітаўта Вялікага (Літва) і Інстытутам ВКЛ (Літва).

Праграма прадугледжвае выкладанне асноў сучаснай еўрапейскай палітыкі, эканомікі і культуры. Заняткі праводзяць вядучыя беларускія спецыялісты ў гэтай галіне. Апроч лекцый і семінараў, праграма ўключае майстар-класы, практычныя заняткі і летнюю школу.

Заняткі будуць праходзіць з 14 студзеня па 31 траўня 2015 года (штосераду з 18.30 да 21.30).

Летняя школа праграмы пройдзе ў чэрвені 2015 года.

Праграма "Еўрапейскі Саюз: палітыка, эканоміка, культура" арыентаваная на засваенне сучасных ведаў і тэхнік інтэлектуальнай працы і не дублюе існуючыя праграмы дзяржаўных і недзяржаўных навучальных устаноў.

Сертыфікат "Беларускага калегіюма" не замяняе дыплом аб вышэйшай адукацыі.

Навучаньне ў "Беларускім калегіюме" - бясплатнае.

Набор навучэнцаў ажыццяўляецца на конкурснай аснове і базуецца на выніках сумоўя.

Каб атрымаць запрашэнне на сумоўе, неабходна:

1. Запоўніць анкету;
2. Напісаць матывацыйны ліст і прымацаваць да анкеты.

У матывацыйным лісце вы мусіце апісаць уласны досвед вывучэння еўрапейскай праблематыкі, матывацыю паступлення на праграму, планы далейшай прафесійнай кар’еры, а таксама ролю навучання ў "Беларускім калегіюме" ў вашым далейшым жыцці. Памер матывацыйнага ліста: каля 0,5-1 старонкі.

Тэрмін падачы заявак: да 8 снежня 2014 года.

Па ўсіх пытаннях звяртайцеся на адрас электроннай пошты: [email protected].

Асноўныя навучальныя курсы:

• Уводзіны ў сучасную еўрапейскую палітыку (Андрэй Казакевіч, доктар палітычных навук, Інстытут "Палітычная сфера");
• Уводзіны ў еўрапейскую інтэграцыю (Алесь Лагвінец, Вераніка Мазуркевіч, "Еўрапейскі клуб");
• Усходняя палітыка Еўрапейскага Саюза. Дачыненні ЕС і Беларусі (Яўген Прэйгерман, "Ліберальны клуб");
• Еўропа і яе "іншыя": культурнае памежжа і сутыкненне цывілізацый (Ігар Бабкоў, кандыдат філасофскіх навук, Інстытут філасофіі НАН Беларусі);
• NATO (АПАД) і еўрапейская палітыка бяспекі (Вячаслаў Пазняк, кандыдат філасофскіх навук, ЕГУ);
• Палітыка памяці ў аб’яднанай Еўропе (Аляксей Ластоўскі, кандыдат сацыялагічных навук, Інстытут "Палітычная сфера");
• Гісторыя і тэорыя дэмакратыі ў сучаснай Еўропе (Уладзімір Роўда, кандыдат філасофскіх навук);
• Палітыка ЕС у дачыненні да краін Блізкага Усхода і Кітая (Аляксандр Філіпаў, кандыдат палітычных навук, Беларускі ўніверсітэт культуры і мастацтваў);
• Уводзіны ў эканоміку Еўрапейскага Саюза (Антон Болтачка, "Ліберальны клуб");
• Публічная палітыка Еўрапейскага Саюза (Вадзім Смок, Інстытут "Палітычная сфера");
• Еўрапейская медыя-прастора (Аляксей Крывалап, кандыдат культуралогіі, Інстытут "Палітычная сфера");
• Еўрапейская і еўраатлантычная інтэграцыя (на прыкладзе краін Балтыі) (Андрэй Валодзькін, кандыдат гістарычных навук, Інстытут гісторыі НАН Беларусі).