"Жыццё пасля раку" - кнігу рэальных анкалагічных гісторый прэзентуюць у Мінску

У Беларусі людзі хаваюць, што яны маюць анкалагічныя хваробы і дыягназ рак успрымаецца многімі як прысуд. Мэтай гэтага праекта было змяніць гэты стэрэатып і расказаць пра людзей, якія перамаглі хваробу і лічаць, што гэтае выпрабаваньне змяніла і ўдасканаліла іх жыццё. Кніга выйшла ў серыі "Бібліятэка Свабоды".

Павал Маісееў, загадчык аддзелу арганізацыі супрацьракавай барацьбы Рэспубліканскага цэнтра анкалогіі і медыцынскай радыялогіі, адным з першых прачытаў гісторыі і напісаў пасляслоўе да кнігі, адзначыўшы яе пазітыўны эфект: 

"Яшчэ дзесяць, нават пяць гадоў таму такое проста нельга было ўявіць, каб людзі ў нашай краіне публічна, не хаваючыся, распа­вядалі пра сваю хваробу, пра "чуму 21 стагоддзя - рак. Людзі пачынаюць цікавіцца праблемай ракавых захворванняў, пазнаюць нешта новае для сябе, кажучы медыцынскай мовай, павышаюць сваю "анкалагічную пісьмен­насць". Тут абсалютна дарэчны прынцып: "Хто інфармаваны - той узброены!" 

Ідэя праекта "Жыццё пасля раку" належыць Ганне Соўсь, яна ж і ўкладальніца кнігі. Паводле яе слоў, у Беларусі 95% людзей хаваюць тое, што яны хварэюць на рак. Сярод герояў "Жыцця пасля раку" - музыка, банкір, клоўн, палітычны актывіст, тэатральны крытык, настаўніца ангельскай мовы, святар, пенсіянер... Гэта людзі розных ўзростаў, інтарэсаў, перакананняў, сацыяльных статусаў.

20 кастрычніка 2014 года адбудзецца ўрачыстая прэзентацыя кнігі з удзелам яе аўтараў і герояў, а таксама беларускіх музыкаў. Гэтая імпрэза распачне кампанію "Перакможам", мэта якой сабраць як можна больш пазітыўных прыкладаў перамогі над гэтай хваробай. На мерапрыемстве выступяць таксама беларускія гурты NAVI, RECHA i RAHIS. Месца правядзення: малая зала к/з "Мінск" (Мінск, вул. Кастрычніцкая, 5, ст.м. "Першамайская"). Пачатак у 19.00. Уваход вольны!