Эксперт: Расія нас правакуе на антырасійскія заявы і дзеянні

У эфіры Еўрарадыё эксперт Цэнтра стратэгічных і знешнепалітычных даследаванняў Юрый Царык расказваў, чаму лічыць заявы Рашэтнікава правакацыяй і як ацэньвае дзеянні беларускага МЗС. 

"Беларускі МЗС лагічна, карэктна і чакана адрэагаваў на словы афіцыйнай асобы Расіі. Хоць усе мы ведаем, што спадар Рашэтнікаў дабывае апошнія дні на пасадзе дырэктара Расійскага інстытута стратэгічных даследаванняў", - личыць эксперт.

На яго думку, нават незалежна ад гэтай падзеі ў цэлым сітуацыя ў беларуска-расійскіх адносінах крайне напружаная, "такога яшчэ не было".

"Раней стараліся некаторыя рэчы спускаць на тармазах. Была такая практыка. Нават крыху несіметрычная, - зазначае эксперт. - Расійскі бок робіць канкрэтныя крокі, скіраваныя на далейшую эскалацыю напружанасці ў беларуска-расійскіх адносінах. І правакаванне неадэкватных і некарэктных крокаў з нашага боку".

Юрый Царык гаворыць, што пэўныя колы ў Расійскай Федэрацыі былі б рады, калі б гэтыя падзеі выліліся ў палітычны скандал і некарэктныя паводзіны беларускага лідара на саміце ў Пецярбургу. Бо "ў Расіі цяпер развязаныя рукі для дзеянняў на постсавецкай прасторы".

"Пусціць цяпер антырасійскую хвалю было б памылкай, якую расійскі бок можа выкарыстаць у сваіх мэтах. І Расія гэтага чакае і да гэтага нас падштурхоўвае", - заключае аналітык.