Экс-віцэ-міністр замежных справаў Польшчы: Варшава паказвае, што на яе можна ціснуць

Польшча паказвае рэжыму Лукашэнкі, што на яе можна ціснуць і дабівацца свайго, і гэта ўжо дрэнна само па сабе, зазначае палітык у інтэрв'ю «Радыё Рацыя».

– Гэта памылка высылаць такі сігнал беларускаму боку. Гэта нейкі абмен, ціск на польскі бок, каб змяніць медыйную палітыку. Лепш працягваць палітыку паразумлення з Беларуссю, шукаць вырашэння праблем, але не цаной “Белсату”. Мы ўвогуле здзіўлены, што “Белсат” стаў прадметам нейкага гандлю.

Павел Коваль зазначыў, што можа абгрунтаваць дзеянні польскага МЗС прагматызмам, але ў дадзеным выпадку можа аказацца, што ліквідацыя “Белсата” стане фатальнай памылкай. Польскі ўрад не павінен быць упэўнены, што ў дыялогу з Лукашэнкам Варшава размаўляе з Менскам, а не Масквой.

– Мы насамрэч не ведаем, якія планы ў Лукашэнкі, не ведаем, ці ён незалежны ў гэтых планах, і ці не здарыцца так, што мы размаўляем быццам з ім, а насамрэч – з Масквой. Можа аказацца так, што Лукашэнка ў гэтай справе ўвогуле не мае чаго сказаць, і размаўлялі мы з тым, каго не бачылі, хто хаваўся за заслонай.

Нагадаем, што міністр замежных справаў Польшчы Вітальд Вашчыкоўскі у інтэрв’ю польскаму парталу wpolityce.pl паведаміў аб закрыцці “Белсата” ўзамен за абяцанне Лукашэнкі пусціць у кабельныя сеткі польскі тэлеканал. Грошы, якія раней прызначаліся на ўтрыманне адзінага ў свеце беларускамоўнага тэлеканала, маюць пайсці на дапамогу сірыйскім ўцекачам.