Беларусь аднавіла дыпламатычную прысутнасць у Швецыі

Стасункі паміж Беларуссю і Швецыяй абвастрыліся пасля "плюшавага дэсанту" 4 ліпеня 2012 году. Некалькі грамадзянаў Швецыі праляцелі на лёгкім самалёце ўглыб тэрыторыі Беларусі і скінулі з самалёта плюшавых мядзведзікаў з надпісамі за свабоду слова ў Беларусі.

Амбасада Швецыі ў Мінску была зачынена 30 жніўня 2012 года. Тады спыніла працу і амбасада Беларусі ў Стакгольме. Дыпламатычнаму канфлікту папярэднічала рашэнне беларускіх уладаў не працягваць акрэдытацыю амбасадару Стэфану Эрыксану, якога абвінавацілі ў дэструктыўнай дзейнасці. У адказ улады Швецыі заявілі, што не прымуць новага амбасадара Беларусі, і параілі двум супрацоўнікам беларускага пасольства пакінуць Стакгольм.

Вясной 2013 году беларускі бок задаволіў просьбу шведаў і акрэдытаваў у Мінску часовага паверанага ў справах Швецыі ў Беларусі.

Новым амбасадарам Швецыі ў Беларусі быў прызначаны Марцін Оберг. У студзені ён заявіў пра значнае паляпшэнне адносінаў паміж Мінскам і Стакгольмам, асабліва калі параўноўваць з 2012 годам, паведамляе "Радыё Свабода".