Заява Беларускай нацплатформы грамадзянскай супольнасці адносна адбыўшыхся парламенцкіх выбараў

Заява

Беларускай нацыянальнай платформы
Форума грамадзянскай супольнасці Усходняга партнёрства

"Аб выбарах дэпутатаў Палаты прадстаўнікоў Нацыянальнага сходу Рэспублікі Беларусь шостага склікання"

22 верасня 2016 года

Беларуская нацыянальная платформа Форума грамадзянскай супольнасці Усходняга партнёрства, абапіраючыся на прамежкавыя і заключныя справаздачы беларускіх арганізацый грамадзянскай супольнасці аб ходзе і выніках выбарчага працэсу (у прыватнасці, матэрыялы маніторынгаў Праваабарончага цэнтра "Вясна", Беларускага Хельсінскага камітэта і Беларускай асацыяцыі журналістаў), канстатуе: што, нягледзячы на некоторыя нязначныя пазітыўныя змены ў характары выбарчай кампаніі, прайшоўшыя выбары не могуць быць прызнаныя дэмакратычнымі, свабоднымі і адкрытымі.

Падчас выбараў 2016 года прысутнічалі некаторыя нязначныя пазітыўныя змены ў характары выбарчай кампаніі. Так неабходна адзначыць, што:

• у параўнанні з папярэднімі кампаніямі, падчас збору подпісаў за вылучэнне кандыдатаў і падчас правядзення агітацыі значных перашкод з боку ўладаў не было;
• колькасць адмоў у рэгістрацыі ініцыятыўных груп і адмоў у рэгістрацыі кандыдатаў было нязначным;
• пры фарміраванні тэрытарыяльных, акруговых і ўчастковых выбарчых камісій дапускалася магчымасць прысутнасці назіральнікаў;
• пры фарміраванні тэрытарыяльных і акруговых выбарчых камісій часам дапускалася практыка адкрытага абмеркавання кандыдатаў на ўключэнне ў камісію, а таксама практыка персанальнага галасавання ў выпадку конкурсу за месца ў камісіях;
• у шэрагу выпадкаў (27%) працэдура праверкі акруговымі выбарчымі камісіямі подпісаў за вылучэнне ў кандыдаты была празрыстай для назірання;
• умовы правядзення масавых агітацыйных мерапрыемстваў і размяшчэння агітацыйных матэрыялаў былі лепш, чым у папярэдніх выбарчых кампаніі 2015 і 2012 гадоў.

Пры наяўнасці гэтых пазітыўных тэндэнцый, у цэлым, дадзеная выбарчая кампанія істотна не адрознівалася ад усіх папярэдніх.

У ходзе гэтых выбараў:

• адсутнічалі роўныя ўмовы доступу ўсіх кандыдатаў да дзяржаўных СМІ;
• пры фармаванні выбарчых камісій ужываўся дыскрымінацыйны падыход да прадстаўнікоў апазіцыйных палітычных партый і незалежных арганізацый грамадзянскай супольнасці;
• шырока выкарыстоўваўся адміністрацыйны рэсурс на карысць праўладных кандыдатаў;
• прысутнічалі шматлікія факты прымусу да ўдзелу ў датэрміновым галасаванні;
• працэдура падліку галасоў засталася непразрыстай для назіральнікаў і, у значным ліку выпадкаў, праводзілася з парушэннем устаноўленага парадку.

Беларускія ўлады не ўлічылі большасці рэкамендацый БДІПЧ АБСЕ па паляпшэнні выбарчага працэсу, а тыя нязначныя змены, якія былі зроблены, не прывялі да яго большай адкрытасці і дэмакратычнасці.

Мы вымушаны канстатаваць, што выбары дэпутатаў Палаты прадстаўнікоў Нацыянальнага сходу Рэспублікі Беларусь шостага склікання 2016 года не адпавядалі як патрабаванням базавых міжнародных стандартаў, так і выбарчаму заканадаўству Рэспублікі Беларусь і не могуць быць прызнаныя дэмакратычнымі, свабоднымі і адкрытымі.

Мы таксама лічым, што абранне ў склад Палаты прадстаўнікоў дзвюх незалежных кандыдатаў не дае падстаў лічыць гэтыя выбары больш дэмакратычнымі. Мы мяркуем, што такая сітуацыя склалася ў выніку наўмыснага маніпулявання ўладамі выбарчым працэсам і істотных фальсіфікацый у працэсе галасавання.

Беларускія арганізацыі грамадзянскай супольнасці — удзельнікі Беларускай нацыянальнай платформы Форуму грамадзянскай супольнасці Усходняга партнёрства

Спампаваць дакумент

Скачать документ

Download document