Адбываецца гістарычны візіт польскіх парламентароў у Мінск

Цягам трох дзён група дэпутатаў на чале з віцэ-маршалкам Рышардам Тэрлецкім знаходзіцца ў Беларусі, дзе сярод іншага пройдуць сустрэчы з кіраўнікамі палатаў непрызнаванага беларускага парламента, намесніцай міністра замежных спраў Беларусі Аленай Купчыной. Сустрэча дэлегацыі польскіх парламентароў з Міхаілам Мясніковічам і Уладзімірам Андрэйчанкам запланавана на 2 жніўня, паведамляе "Радыё Рацыя".

У апошні дзень візіту, 4 жніўня, польскія парламентарыі сустрэнуцца з прадстаўнікамі беларускай дэмакратычнай супольнасці.

Польскі эксперт па ўсходняй палітыцы, гісторык і публіцыст Ежы Таргальскі адзначыў, што чарговы раз польскія ўлады спадзяюцца на тое, што ўдасца адарваць Лукашэнку ад Расі, а гэта памылковае ўяўленне:

- Лукашэнка не зменіць спосабу свайго кіравання. Ён – дыктатар і дыктатарам застанецца. Тое, што надышоў чарговы этап нейкіх жэстаў, нічога не значыць. Бо Лукашэнка такія жэсты ў перапынках між саджаннем людзей у турму заўсёды робіць. Магчыма, польская дэлегацыя спадзяецца палепшыць сітуацыю польскай нацменшасці ў Беларусі. Але маю сумненні, што да гэтых зменаў дойдзе. Польская нацменшасць у Беларусі – гэта закладнік Лукашэнкі. Таму выпадае шантажаваць гэтай сітуацыяй.

 Прафесар Ежы Таргальскі не выключыў, што ахвярамі спробаў палепшыць дачыненні афіцыйнага Мінска і Варшавы стануць медыяльныя праекты, якія падтрымлівае польскі ўрад. Эксперт адзначае, што беларускія незалежныя СМІ, якія вяшчаюць з Польшчы, хутчэй за ўсё не зачыняць, але маргіналізуюць іх уплыў.

Публіцыст польскага парталу reporters.pl Марэк Буцька адзначае, што падобныя частыя візіты еўрапейскіх і польскіх палітыкаў у Беларусь адбываюцца на фоне нязменнай унутранай палітыкі рэжыму Аляксандра Лукашэнкі:

– Той жа Лукашэнка выпусціў некалькі асобаў з турмаў, але іншыя вязні надалей сядзяць у турмах. Працягваюцца рэпрэсіі, якія палягаюць на звальненні людзей з працы ў Мінску, у рэгіёнах, а таксама на штрафах. Апазіцыя практычна не была дапушчана ў выбарчыя камісіі ў сёлетніх парламенцкіх выбарах. Якія змены? Няма змен, бо рэпрэсіўная сістэма была і засталася. Еўропа змянілася і змянілася ў горшы бок. Шмат гаворачы пра правы чалавека і дэмакратычныя свабоды, адначасова спадары дэпутаты туды едуць і робяць выгляд, што сустракаюцца з паўнапраўным парламентам – з рэжымным беларускім парламентам.

Польскія парламентарыі сустрэнуцца ў Мінску не толькі з афіцыйнымі ўладамі, але і з прадстаўнікамі дэмакратычнай апазіцыі.

“Я заўсёды выступаў за паслядоўны дыялог з афіцыйным Мінскам, але дыялог можа быць розны, – адзначае лідар Руху “За Свабоду” Аляксандр Мілінкевіч. – Трэба, каб дыялог абавязкова быў крытычны і абумоўлены. Тое, што візіт адбываецца напярэдадні выбараў, – гэта пэўны аванс уладзе. Вельмі важна, каб у час гэтага візіту яшчэ раз было падкрэслена, што Польшча не будзе праводзіць чыстую геапалітыку, а будзе займацца эканамічнай, палітычнай і культурнай супрацай.

Сустаршыня партыі БХД Павел Севярынец выказаў здзіўленне даведаўшыся пра сустрэчу польскіх парламентарыяў з кіраўнікамі непрызнаваных міжнароднай супольнасцю палат парламента:

– Польшча – краіна самастойная, яна вольная выбіраць, з кім ёй сябраваць. Але нашае перакананне, што партнёры дэмакратычнай Польшчы – гэта людзі, якія выступаюць за дэмакратыю ў Беларусі, а не тыя, хто гэтую дэмакратыю топча. Думаю, што ў нас будзе магчымасць сказаць пра гэта асабіста высокім гасцям на сустрэчы. A

Польская парламенцкая дэлегацыя на чале з віцэ-маршалкам Сейма ўпершыню наведвае Мінск з афіцыйным візітам пасля рэферэндуму 1996 года.

20 гадоў таму Аляксандр Лукашэнка змяніў Канстытуцыю Беларусі, паводле якой значна пашырыў свае паўнамоцтвы за кошт парламенцкай галіны ўлады. Тады ж фактычна быў разагнаны апазіцыйны кіраўніку Беларусі Вярхоўны Савет 13 склікання. Вынікі рэферэндуму і далейшыя выбары ў Палату прадстаўнікоў не прызнаваліся міжнароднай супольнасцю.
Чытай больш на: http://www.racyja.com/palityka/gistarychny-vizit-polskikh-parlament/