Беларускі нацыянальны кангрэс прызначаны на 15 траўня ў Мінску ля помніка Янку Купалу

Мікалай Статкевіч заявіў, што сябрам аргкамітэту кангрэсу было адмоўлена ў прадстаўленні памяшкання. Паводле ягоных слоў, літаральна ўчора яны абышлі 13 памяшканняў у Мінску, і ва ўсіх выпадках кіраўніцтва заяўляла, што на бліжэйшы час усё занята.

«Такім чынам, мы маем справу з палітычным рашэннем уладаў, накіраваным на зрыў кангрэсу», — кажа Статкевіч.

Але ён падкрэслівае, што ўстаноўчая сесія кангрэсу ўсё роўна пройдзе.

Статкевіч заклікае ўсіх прыходзіць 15 траўня да помніка Янку Купалу а 12-й гадзіне, каб падтрымаць дэлегатаў кангрэсу, «падтрымаць нашу барацьбу». Палітык таксама заклікае прыходзіць еўрапейскіх дыпламатаў, каб яны самі пабачылі, ці ёсць пазітыўныя змены ў палітыцы беларускіх уладаў.

Уладзімір Някляеў сказаў, што ўстаноўчая сесія кангрэсу, такім чынам, фактычна ператвараецца ў несанкцыянаванае мерапрыемства, і яны разумеюць, што наступствам гэтага можа быць адміністрацыйная адказнасць удзельнікаў.

Правядзенне кангрэсу дэмсіл з мэтай кансалідацыі апазіцыі ініцыявала 17 снежня мінулага году група грамадзкіх дзеячаў. На наступны дзень Мікалай Статкевіч, Уладзімір Някляеў і Станіслаў Шушкевіч абвясцілі пра стварэнне аргкамітэту па падрыхтоўцы кангрэсу, паведамляе "Радыё Свабода".