Міліцыянт тры гадзіны даказваў каардынатару БХД, што празрыстыя выбары ў Беларусі непатрэбныя

Намеснік каардынатара аргкамітэту БХД па Мінскай вобласці Раман Ганчароў, які падчас выбарчай кампаніі быў назіральнікам на 15 участку ў Маладзечне, 29 кастрычніка па сваіх скаргах быў выкліканы ў міліцыю, дзе правёў каля трох гадзін, паведамляе сайт аргкамітэта партыі.

У прыватнасці, міліцыянт даказваў, што выбарчая камісія не абавязаная даваць інфармацыю пра колькасць выбаршчыкаў, нягледзячы на тое, што актывіст у сваёй скарзе звяртаў увагу на арт. 13 Выбарчага кодэксу, у якім сказана пра галоснасць падчас падрыхтоўкі і правядзення выбараў. Прадстаўнік міліцыі па выніку паведаміў, што ў адказе напіша пра адмову ўзбуджэння справы. 

Датычна яшчэ адной скаргі, якая была дасланая па пошце 13 кастрычніка, міліцыянт заявіў, што яна прыйшла ўжо пасля адведзенага часу для абскарджвання, і таму яе разглядаць таксама не будуць.

Увогуле ж прадстаўнік міліцыі заявіў, што Раман Ганчароў пісаў скаргі не дзеля таго, каб палепшыць сітуацыю з выбарамі, а каб зарабіць грошы.