Андрэй Казакевіч: У Еўропе адбываецца канкурэнцыя паміж падыходамі да Беларусі

 Такую думку выказаў у размове са Службай інфармацыі “ЕўраБеларусі” кіраўнік Інстытута палітычных даследванняў “Палітычная сфера” Андрэй Казакевіч, каментуючы інфармацыю пра выпрацоўку органамі ЕС новай палітыкі ў дачыненні да Беларусі, якую агучыў дэпутат Еўрапарламенту Філіп Качмарэк на сустрэчы з беларускімі грамадскімі дзеячамі.

Эксперт адзначыў, што зараз у дачыненнях паміж Еўрапейскім саюзам і Беларуссю назіраецца пэўны застой, і, хутчэй за ўсё, пэўны статус-кво будзе падтрымлівацца і надалей. Беларускі бок не робіць ніякіх крокаў насустрач Еўропе, а для ЕС, у сваю чаргу, беларускае пытанне не такое істотнае, асабліва на фоне шласных праблем.

“І я лічу вельмі малаверагодным, што будуць прымацца нейкія актыўныя, энэргічныя новыя захады з боку Еўрасаюзу”,- сказаў Андрэй Казакевіч. На ягоную думку, заява Філіпа Качмарэка сведчыць хіба толькі пра тое, што праекты больш жорсткай палітыкі абмяркоўваюцца на еўрапейскім узроўні. “Гэта не сакрэт, іх абмяркоўваюць дастаткова даўна, і адбываецца канкурэнцыя паміж рознымі падыходамі ў дачыненні да Беларусі. І абсалютнага кансэнсусу па гэтым пытанні ўнутры Еўропы няма”,- заўважыў палітолаг, адзначыўшы, што больш пэўную ацэнку такім праектам можна будзе даць толькі пасля таго, як пра іх з’явіцца больш інфармацыі.

Інфармацыю пра выпрацоўку новай палітыкі ў дачыненні да Беларусі пакуль ня варта нават успрымаць, як своеасаблівы сігнал з боку Брусэлю, які стаміўся чакаць ад афіцыйнага Мінска нейкіх рэальных крокаў насустрач, лічыць эксперт. “Сапраўдны сігнал мусіць сыходзіць у іншых кантэкстах і ад іншых асобаў. Магчыма, можна разглядаць гэтую заяву, як нейкую дадатковую інфрмацыю, якая так ці інакш можа аказаць уплыў на дзеянні беларускіх уладаў”,- выказаў версію Андрэй Казакевіч.

На ягоную думку, прагназаваць нейкіх істотных зрухаў у беларуска-еўрапейскіх стасунках пакуль не выпадае: “Пакуль асноўная праблема палягае ў тым, што ў беларускага кіраўніцтва адсутнічае выразная палітычная воля і дакладная візія таго, што трэба рабіць у дачыненні да Еўропы. Таму і няма гатовасці рабіць пэўныя крокі да паляпшэння стасункаў з Еўропай”.

Таму, калі беларускае кіраўніцтва і пойдзе на саступкі Еўропе, то гэта будзе крокам хутчэй тактычным і вымушаным. “Як паказвае практыка, асноўным чыннікам, які прымушае афіцыйны Мінск рабіць крокі насустрач Еўропе, выступае фінансавы стан краіны: калі пачынаюцца праблемы з Расіяй, з энэрганосьбітамі, крэдытнай дапамогай…”- сказаў палітолаг.