Уздоўж беларускай мяжы пабудуюць аўтастраду з Літвы да Грэцыі

У 2006 годзе міністры транспарту Польшчы, Літвы, Славаччыны і Вугоршчыны падпісалі дэкларацыю аб будаўніцтве найкарацейшай аўтадарогі на восі Поўнач-Поўдзень Еўропы. Праз чатыры гады да гэтай ініцыатывы далучыліся Балгарыя, Румынія і Грэцыя.

Via Carpatia будзе праходзіць ад Клайпеды праз Коўна ў Літве, праз Беласток і Люблін у Польшчы, славацкія Кошыцэ далей праз Вугоршчыну, Румынію, Балгарыю і Грэцыю.

Беларусь ў праекце Via Carpatia не ўдзельнічае, але яе адрэзак ад літоўскай мяжы да Любліна на польскім баку будзе праходзіць у непасрэдным суседстве беларускай мяжы. Даехаць ад памежных пераходаў з Польшчай да аўтабану, які вядзе ў Грэцыю, беларусам зойме менш за гадзіну, а на некаторых адрэзках — да паўгадзіны.

"Прыйшоў час, калі мы рэальна пачынаем рэалізацыю інвестыцыі Via Carpatia, стратэгічнай дарогі для Цэнтральна-Ўсходняй Еўропы", — сказала прэмʼер-міністар Польшчы Беата Шыдла на прэс-канферэнцыі з нагоды 10-годдзя прыняцця "Ланьцуцкай дэкларацыі".

Напрыканцы кастрычніка больш за паўтысячы дэпутатаў Еўрапейскага парламенту прынялі справаздачу прысвечаную развіццю транспартнай інфраструктуры ў Цэнтральна-Ўсходняй Еўропе. У гэтым дакуменце ёсць заклік да Еўракамісіі і краін-сябраў ЕС распачаць неабходныя крокі для рэалізацыі фінансавага боку інвестыцыі Via Carpathia, паведамляе "Радыё Свабода".