Пытанне пра крэдыт Беларусі МВФ можа разгледзець да студзеня 2017-га

Пасяджэнне Савета дырэктараў Міжнароднага валютнага фонду, на якім можа быць разгледжана пытанне аб выдзяленні крэдыту Беларусі, адбудзецца ў снежні 2016 года або ў студзені 2017 года. Паводле звестак БелаПАН, у сувязі з гэтым беларускі бок разлічвае ў самыя кароткія тэрміны ўзгадніць з МВФ праекты тэхнічнага мемарандума і лісты аб намерах — дакументаў, якія з'яўляюцца асновай для новай праграмы Беларусі з фондам.

Пры гэтым чакаецца, што ў лістападзе ў Мінск прыбудуць тэхнічныя місіі МВФ і Сусветнага банка для вырашэння праблемных пытанняў, якія ў найбольшай ступені хвалююць беларускія ўлады. Гаворка ідзе пра сацыяльныя наступствы павышэння тарыфаў на жыллёва-камунальныя паслугі, а таксама патэнцыйны рост беспрацоўя ў сувязі з рэфармаваннем сектара дзяржпрадпрыемстваў.

Беларусь ужо працяглы час спрабуе атрымаць ад МВФ крэдыт у памеры 3 млрд долараў.