Алкаголь і тытунь у Duty Free Літвы ўсё ж не знікне, але падаражэе

Як паведамлялася, з новага года беларусы і турысты, якія будуць ехаць з Еўрасаюза ў Беларусь, не змогуць купіць бяшпошліныя тавары ў Duty free. Аказалася, гэта не зусім так.

"Для ўсіх дарожных крамаў Duty Free з 1 студзеня не застанецца актыўных ільгот на продаж алкаголю і тытуню. Гэта вызначаюць новыя акцызныя правілы Літвы. Я мяркую, што гандаль на дарожных пастах як быў, так і застанецца. Не будзе толькі ільгот для цыгарэтаў і алкаголю. Іх кошт наблізіцца да коштаў у звычайных крамах", — расказала "Еўрарадыё" кіраўнік Аддзела камунікацый мытнай службы Літвы Генрыка Рукшынене.

Па словах чыноўніцы, гэтае рашэнне выклікана новай дырэктывай Еўрасаюза, якая агаворвае правілы бяспошліннага гандлю.

Ранейшы фармат крамы Duty Free захаваюць толькі ў аэрапортах, там алкаголь і цыгарэты можна будзе па-ранейшаму набыць з нізкай нацэнкай.