Расія абяцае, што павялічыць пастаўкі нафты ў Беларусь

"Па пастаўках на НПЗ "Мазыр“ і "Нафтан“ у адпаведнасці з расійска-беларускім пратаколам у чацвёртым квартале плануецца прапампаваць па нафтаправодзе "Дружба“ 5 млн тон (2,6 млн тон і 2,4 млн тон адпаведна)", — паведаміў афіцыйны прадстаўнік "Транснафты" Ігар Дзёмін.

Раней Беларусь і Расія дамовіліся, што беларускі бок адменіць сваё рашэнне аб падвышэнні тарыфаў на транзіт расійскай нафты, а Расія адновіць абʼёмы паставак. Таксама Беларусь да 20 кастрычніка павінна ў поўным абʼёме пагасіць запазычанасіць за расійскі газ, якая перавышае 300 млн даляраў.

Раней Расія пагражала зменшыць пастаўкі нафты для Беларусі ў чацвёртым квартале да трох мільёнаў тон. За 2016 год замест запланаваных 23 мільёнаў тон расійскі бок збіраўся паставіць усяго толькі 18 млн тон.

Аляксандар Лукашэнка скрытыкаваў дзеянні расійскіх уладаў, якія не пагаджаліся з ільготнай цаной газу і скарацілі пастаўкі нафты для Беларусі. 7 кастрычніка на сустрэчы з Нацыянальным сходам мінулага і новага скліканняў Лукашэнка заявіў, што Беларусь вядзе перамовы з Іранам пра пастаўкі нафты. "Аж да таго, што мы ім дамо ўсе магчымасці на Мазырскім або іншым заводзе: перапрацоўвайце сваю нафту і прадавайце, дзе лічыце патрэбным", — падкрэсліў ён. Паводле Лукашэнкі, перад урадам пастаўлена задача шукаць альтэрнатыву расійскай нафце, паведамляе "Радыё Свабода".