МАЗ, МТЗ, Беларуськалій... Прамысловыя гіганты звальняюць рабочых

Міністэрства фінансаў апублікавала вынікі дзейнасьці адкрытых акцыянэрных таварыстваў за ІІ квартал 2016 году. Згодна зь імі, за год практычна ўсе з найбуйнейшых ААТ звальнялі працаўнікоў. 30 найбуйнейшых ААТ страцілі амаль 4 тысячы чалавек.

Топ-10 найбуйнейшых ААТ па колькасьці працаўнікоў цяпер выглядае так:

МТЗ - 16,8 тысячы чалавек, мінус 690 чалавек, альбо 3,9 % да 2015 году;

МАЗ - 16,6 тысячы, мінус 1 222, альбо -6,9 %;

«Беларуськалій» - 16,5 тысячы, мінус 477, альбо - 2,8 %;

БМЗ - 10,9 тысячы, мінус 62, альбо - 0,6 %;

«Белшына» - 10,3 тысячы, мінус 283, альбо - 2,7 %;

«Нафтан» - 10 тысяч, мінус 827, альбо - 7,6 %;

«БелАЗ» - 9,9 тысячы, мінус 170, альбо -1,7-%;

«Гомсельмаш» - 8,7 тысячы, плюс 552, альбо +6,8 %;

«Гродна Азот» - 7,6 тысячы, мінус 188, альбо - 2,4 %;

«Газпром трансгаз Беларусь» - 6,6 тысячы, плюс 109, альбо +1,7 %.

Сярод буйных прадпрыемстваў вялікія страты ў працаўніках за год таксама панесьлі МАПІД (мінус 11,3 % працаўнікоў, засталося 6 тысяч), Будаўнічы трэст № 8 (мінус 10,7 % працаўнікоў, засталося 3,8 тысячы) і Менскі маторны завод (мінус 7,3 % працаўнікоў, засталося 4,6 тысячы).

Агулам з пачатку 2016 году ў Беларусі звольнілі на 92 тысячы больш, чым прынялі на працу. Але афіцыйна беспрацоўе пры гэтым не павялічылася. (Свабода нядаўна шукала, куды зьніклі працаўнікі).

За 5 год МАЗ страціў 40 % працаўнікоў, МТЗ - 31 %, «Белшына» - 20 %, «Нафтан» - 23 %, МАПІД - 38%, ММЗ - 33%, а Менскі падшыпнікавы завод - 60 %. Беларуськалій зьменшыў штат толькі на 10 %. Але, напрыклад, Мазырскі НПЗ павялічыў штат за 5 год на 15 %, а «Гродна Азот» - на 5 %, паведамляе "Радыё Свабода".