Вадзім Іосуб: Да канца года долар не перавысіць адзнаку 2 рублі 15 капеек

 Учора на таргах Беларускай валютна-фондавай біржы беларускі рубель крыху знізіўся да долара ЗША і еўра, але ўмацаваўся да расійскага рубля.

 З пачатку году долар падарэжаў усяго на 10 капеек. Ці можна сказаць, што беларускі рубель “намацаў дно”? Сітуацыю з курсамі валют для "Радыё Рацыя" каментуе аналітык кампаніі „Альпары” Вадзім Іосуб:

- Рубель ужо даўно не шукае дно, пра гэта нават не карэктна разважаць. Але можна сказаць, што рубель дастаткова стабільны. Пасля моцнага падзення на пачатку году, затым ён умацаваўся і з пункту гледжання кошыка валют трымае раўнавагу. На цяперашніх узроўнях попыт і прапанова прыкладна ўраўнаважана.

Змяншэнне валютных укладаў Вадзім Іосуб: звязвае з тым, што, верагодна, гэта адбываецца ў выніку падзення рэальных прыбыткаў насельніцтва. "І, каб хоць неяк падтрымліваць спажывецкі ўзровень, людзі праядаюць свае зберажэнні. Відавочна, што іх большая частка – у валюце. І гэта таксама датычыцца наяўнай валюты, якая захоўваецца, як кажуць, “у панчохах”.

Іосуб падкрэслівае, што курс валют шмат у чым будзе залежыць не толькі ад таго, што будзе адбывацца з беларускім рублём, эканомікай і коштам нафты.

"Гэта будзе залежыць, напрыклад, і ад вагання долара да еўра і іншых сусветных валют, што ў сваю чаргу залежыць ад тэмпаў павелічэння адсоткавай стаўкі ў ЗША. Тым не менш, рызыкну спрагназаваць, што ў выпадку, калі будзе працягваца цяперашняя ўмерана-жорсткая палітыка Нацбанка (а пакуль няма ніякіх сігналаў, каб гэтая палітыка змянілася), наўрад долар да канца года перавысіць адзнаку 2 рублі 15 капеек", - гаворыць эксперт.