Камерцыйныя банкі Беларусі сталі зніжаць працэнтныя стаўкі

"Беларусбанк", які з’яўляецца найбуйнейшым трымальнікам укладаў насельніцтва, паведамляе, што максімальная прыбытковасць па дэпазітах фізічных асоб у нацыянальнай валюце цяпер будзе складаць 20,5% гадавых. Такую стаўку камерцыйны банк усталяваў па рублёвых укладах з тэрмінам размяшчэння ад аднаго года.

"Гэта ўсё роўна больш за інфляцыю і таму я думаю, то адначасова будуць зніжацца і працэнты па валютных укладах. Не будзе іншага выйсця акрамя як усё ж такі, калі ў каго засталіся свабодныя сродкі, як толькі класці іх на дэпазіты па гэтых стаўках", — адзначыў эканаміст Леў Марголін.

У сваю чаргу "Белаграпрамбанк", які з’яўляецца другім па велічыні партфеля ўкладаў беларускім банкам, таксама абвясціў пра зніжэнне працэнтных ставак па дэпазітах насельніцтва. Пачынаючы з серады банк усталяваў па іх максімальную працэнтную стаўку 20,5% гадавых пры ўмове размяшчэння ўкладу ня менш чым на 370 дзён.

Пастаяннае памяншэнне прыбытковасці па банкаўскіх укладах летам гэтага года адмыслоўцы тлумачаць цвёрдай манетарнай палітыкай, якую праводзіць Нацбанк, паведамляе “Радыё Рацыя”.