Беларуская чыгунка павялічвае кошт праезду па Расіі на 3-8%

Прадпрыемства тлумачыць такое рашэнне тым, што ААТ «Расійскія чыгункі» павышае міжнародныя тарыфы на праезд пасажыраў у напрамку Беларусі.

Напрыканцы мінулага года БЧ накіроўвала ў Расію прапановы аб зніжэнні ў 2016 годзе кошту квіткоў, паведаміў 1 снежня на брыфінгу ў Мінску першы намеснік начальніка пасажырскай службы ўпраўлення Беларускай чыгункі Андрэй Кашко. Ён растлумачыў, што кошт квіткоў у міжнародных зносінах прывязаны да тарыфнай валюты (швейцарскага франку).

«З улікам эканамічных працэсаў, якія адбываюцца ў Беларусі і Расіі, мы робім сумесныя крокі для зніжэння кошту квіткоў для пасажыраў, у прыватнасці, каэфіцыентаў індэксацыі да базавых ставак тарыфаў. Чарговыя нашы прапановы накіраваныя ў Расію для разгляду, — адзначыў Кашко. — Будзем чакаць, што нам адкажуць нашы расійскія калегі па гэтым пытанні. Мы захавалі базавыя тарыфы 2015 года на 2016 год. Будзем па магчымасці стрымліваць рост тарыфаў, звязаны з эканамічнымі праблемамі».

Што тычыцца коштаў на перавозкі ўнутры краіны, то, як адзначыў прадстаўнік БЧ, «усталёўваць кошты — гэта кампэтэнцыя не БЧ, а Мінэканомікі». «Урад прыме рашэнне альбо пра рост тарыфаў, альбо пра стабілізацыю на ранейшым узроўні», — сказаў ён.

Для параўнання: кошт квітка ў купэйным вагоне фірмовага цягніка Мінск — Масква № 002Б — 192,97 рубля, у спальным вагоне — 380,84 рубля. У плацкарце даехаць да Масквы можна за 80 — 90 рублёў.

Даляцець да Масквы рэйсам Белавія каштуе ад 136 да 145 дэнамінаваных беларускіх рублёў, паведамляе Радыё Свабода.