У Беларусі міліцыя прапануе зноў забараніць продаж алкаголю з 22.00 да 9.00

Пра гэта паведаміў сёння журналістам начальнік упраўлення прафілактыкі галоўнага ўпраўлення аховы правапарадку і прафілактыкі Міністэрства ўнутраных спраў Алег Каразей.

«Пара вырашыць пытанне аб абмежаванні часу рэалізацыі алкагольнай прадукцыі. Таму што ёсць і кругласутачныя крамы, і крамы, якія працуюць да гадзіны ночы. Злачынствы здзяйсняюцца ў больш позні час. Людзям не хапае спіртнога, і яны ідуць у начную краму, а потым іх цягне на прыгоды. Зніжэнню колькасці злачынстваў спрыяла б абмежаванне гандлю алкаголем з 22.00 да 9.00, — сказаў Алег Каразей. — Было б правільна вырашыць пытанне аб рэалізацыі алкагольнай прадукцыі ў спецыялізаваных крамах ці хаця б спецыяльных аддзелах, каб спіртныя напоі не стаялі ў адным шэрагу з таварамі першай неабходнасці».

З пачатку года ў стане алкагольнага ап'янення здзейснена 165 забойстваў, 273 прычыненні цяжкіх цялесных пашкоджанняў, 37 згвалтаванняў, 516 рабаванняў і 81 разбой, 176 згонаў і 960 хуліганстваў, паведамляе БЕЛТА.

Праблемай застаюцца ДТЗ, якія здзяйсняюцца п'янымі кіроўцамі. «Сёлета 136 ДТЗ, у якіх загінулі 32 чалавекі, учыненыя па віне кіроўцаў, якія знаходзіліся ў стане алкагольнага ап'янення. Амаль 12 тысяч чалавек прыцягнута да адміністрацыйнай адказнасці за кіраванне транспартным сродкам у стане ап'янення. Больш за ўсё такіх аварый зарэгістравана ў Віцебскай, Мінскай, Брэсцкай і Гомельскай абласцях», — падкрэсліў Алег Каразей.

У сваю чаргу старшы інжынер-інспектар упраўлення нагляду і прафілактыкі МНС Беларусі Дзяніс Жукоўскі адзначыў: «Па віне нецвярозых грамадзян сёлета адбылося ўжо 110 пажараў (51,6% ад агульнай колькасці). Але ў цэлым за апошнія пяць гадоў зніжаецца колькасць здарэнняў па віне асоб пад уздзеяннем алкагольнага ап'янення».